Qazaqstan túrmelerinde maska tigile bastady
NUR-SULTAN. QazAqparat – Qazaqstannyń túzeý mekemelerinde medıtsınalyq maskalar tigilip jatyr, dep habarlaıdy QazAqparat tilshisi.
Atap ótilgendeı, Іshki ister mınıstri E.Turǵymbaev polıtseılerdi qorǵanys maskalarymen qamtamasyz etý úshin qylmystyq-atqarý júıesiniń (QAJ) túzeý mekemelerindegi óndiristik bazany paıdalanýdy tapsyrdy. Osyǵan oraı, QAJ-dyń «Eńbek» respýblıkalyq memlekettik kásiporny qorǵanys quraldarynyń úlgilerin ázirlegen. Tıisti sertıfıkat ta alynǵan. Standartqa sáıkes ónim materıaly gıpoallergendi sanalady. Shańnan qorǵaıdy, ınfektsııalyq aýrýlardyń juǵý múmkindigin azaıtady.
«Qazir búkil jeke quram erekshe rejımde jumys júrgizip jatyr. Medıtsınalyq qyzmetkerlermen birge karantın sharalaryna belsendi aralasýda. Kezekshilikke kún saıyn 12 myńǵa tarta polıtseı men Ulttyq ulan sarbazy túsedi. Olardyń árbiriniń ómiri men densaýlyǵy mańyzdy. Osyǵan baılanysty túzeý mekemelerindegi tigin tsehtarynda qorǵanys maskalaryn tigip bastaýdy tapsyrdym. Maskalar osyǵan deıingi ózge de qajetti ónimdermen birge tigile beredi. Osylaısha, bir jaǵynan maskaǵa degen suranysty azaıtsaq, ekinshiden sottalǵandardyń jumysqa ornalasyp, eńbektenýine múmkindik týady», - deıdi Erlan Turǵymbaev.
Qazirgi tańda qylmystyq-atqarý júıesindegi túzeý mekemeleriniń alańdarynda myńǵa tarta tigin stanogy bar. Birrettik jáne kóprettik maskalardy tigý jolǵa qoıylǵan. Olardy ishki ister organdarynyń qyzmetkerleri paıdalanady.
24 myń maskadan turatyn alǵashqy partııa bas bostandyǵynan aıyrý mekemelerinde otyrǵan adamdar men ishki ister organdarynyń qyzmetkerlerine beriledi. Búkil el boıynsha óndiristik qýattylyq – táýligine 50 myń maska bolmaq.
