Qazaqstan túrmelerinde 42 700 sottalýshy qamaýda otyr
ASTANA. QazAqparat - Qazaqstan túrmelerinde 42 700 sottalýshy ustalýda. Búgin Májiliste qylmystyq-atqarý júıesindegi máselelerge arnalǵan Úkimet saǵatynda QR Іshki ister mınıstri Qalmuhanbet Qasymov osylaı málim etti.
Vedomstvo basshysynyń aıtýynsha, qylmystyq-atqarý quramynda 75 túzeý kolonııalary bar, sonyń ishinde 18 qonys kolonııalarynda 2 952 sottalýshy ustalýda.
«Jalpy búgingi tańda elimizdegi túrmelerde 42 700 adam ustalýda. Olardyń 3 myń 400-i - áıelder. Budan bólek, 18 arnaıy tergeý oqshaýlaǵyshtarynda 6 myńnan astam adamdar qamaýda. Sonymen qatar 240 qylmystyq-atqarý ınspektsııalardyń esebinde 21 myńnan astam adam bostandyǵyn shektemeıtin jazalardy óteý boıynsha esepte tur», - dedi Q.Qasymov.
Budan bólek, mınıstr qylmystyq-atqarý júıesindegi qaıta qurýlarǵa da toqtalyp ótti. Onyń aıtýynsha, jańa qylmystyq zańnamaǵa sáıkes bas bostandyǵynan aıyrylǵandardy ustaý jaǵdaılaryn jaqsartýǵa oraı túzeý mekemeleriniń zamanaýı túrleri qarastyrylady.
«Otrıadtyq-baraqtyq ustaý túri ábden eskirdi. Sondyqtan da halyqaralyq tájirıbelerdi zerdeleı kele, biz sottalǵandardy kameralyq ustaý júıesine kóshýdi qarastyryp jatyrmyz. Biz qazirgi ýaqytqa deıin segiz mekemeni osy júıege sáıkes qaıta qurdyq, onda qazirgi tańda kameralyq jaǵdaıda bes myńnan astam sottalýshy ustalýda», - deıdi mınıstr.
