Qazaqstan-Túrikmenstannyń saýda-ekonomıkalyq yntymaqastyǵyn kúsheıtýge eleýli áleýet bar - Toqaev
ASTANA. KAZINFORM — Qazaqstan Túrikmenstan ekonomıkasyna 150 mln dollardan astam ınvestıtsııa saldy. Bul týraly Aqordada elimizge memlekettik saparmen kelgen Túrikmenstan Prezıdenti Serdar Berdimuhamedovpen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
- Sizdiń memleketaralyq saparyńyzǵa aıryqsha mán beremin. Ol jan-jaqty memleketaralyq baılanystarymyzdy jańa sapalyq deńgeıge kóterýge baǵyttalǵan. Kóp ǵasyrlyq dostyqqa, tatý kórshilikke, ortaq mádenı ári tarıhı qundylyqtarǵa súıene otyryp, Qazaqstan men Túrikmenstan strategııalyq seriktestik rýhynda turaqty damyp kele jatqan berik ári úılesimdi qatynastar ornatty. Biz bul baılanystardy jan-jaqty nyǵaıtý úshin barlyq kúsh-jigerimizdi odan ári jumsaýǵa nıettimiz, - dedi Qasym-Jomart Toqaev.
Memleket basshysynyń aıtýynsha, eki memleket arasynda barlyq deńgeıde belsendi jáne nátıjeli ózara is-qımyl jolǵa qoıylǵan. Úkimetter arasynda jumys júrgizilip, vedomstvoaralyq baılanystar kúsheıip keledi. Kópjaqty qurylymdar men tetikter aıasynda tıimdi yntymaqtastyq ornatylǵan. Óńirlik jáne halyqaralyq kún tártibindegi kóptegen másele boıynsha ortaq ustanym men uqsas kózqaras bar.
- Jeke kelissózderimiz barysynda ekijaqty yntymaqtastyǵymyzdyń ózekti taqyryptaryn jan-jaqty talqyladyq. Saýda-ekonomıkalyq ózara is-qımylǵa keler bolsaq, biz saýda-ekonomıkalyq yntymaqtastyqty damytýǵa basa nazar aýdarýǵa kelistik. Sońǵy bes jyl ishinde ózara saýda kólemi tórt eseden asa ósip, búginde jarty mıllıard dollardan asty. Bıyl da oń kórsetkishter saqtalyp otyr. Túrikmen kapıtalynyń qatysýymen jumys isteıtin shamamen 140 kompanııa saýda-ekonomıkalyq baılanystardy nyǵaıtýǵa mańyzdy úles qosýda. Olar Qazaqstanda tabysty jumys istep tur. Qazaqstannyń Túrikmenstan ekonomıkasyna salǵan ınvestıtsııalary 120 mıllıon dollardan asyp tústi. Qazaqstan Úkimetine eki el bıznesine qajetti qoldaý kórsetý jóninde tapsyrma berilgen. Sonymen qatar, bizdiń saýda-ekonomıkalyq jáne ınvestıtsııalyq yntymaqtastyǵymyzdy odan ári kúsheıtý úshin eleýli áleýet saqtalyp otyr. Ónerkásip, kólik, logıstıka jáne basqa da salalarda birqatar joba iske asyrylý kezeńinde. Energetıka salasynda, ásirese gaz sektorynda yntymaqtastyq qarqyndy damyp keledi. Bul máseleni qazir talqyladyq. Ózeketi sanalatyn máselelerge oralamyz dep oılaımyn, - dedi Prezıdent.
Buǵan deıin Memleket basshysy Qasym-Jomart Toqaev Túrikmenstan Prezıdentin Aqordada qarsy alǵanyn jazǵan edik.