Qazaqstan Túrikmenstanmen gaz jáne kólik ınfraqurylymy salalarynda yntymaqtastyqty nyǵaıtpaq

ASTANA. KAZINFORM – Bul másele jónine búgin Prezıdent Qasym-Jomart Toqaevtyń Túrikmenstan Halk Maslahatynyń Tóraǵasy Gýrbangýly Berdimuhamedovpen beıresmı kezdesýinde egjeı-tegjeıli aıtyldy.

– Memleketterimiz arasyndaǵy yntymaqtastyqtyń qarqyndy damyp kele jatqany qýantady. Gaz salasynda, sondaı-aq kólik-logıstıka baǵytynda strategııalyq mańyzdy jobalar bar. Biz bul jumystardy baqylaýda ustaımyz. Óıtkeni onyń nátıjesi qazaq-túrikmen ekonomıkalyq baılanystaryn odan ári órkendetýge yqpal etedi, – dedi Prezıdent.

Kezdesýde gaz salasyndaǵy seriktestikti keńeıtý, naqty aıtqanda, Qazaqstan tarapynyń sheteldik seriktestermen birge Galkynysh ken ornyn ıgerý jobasyna qatysý máselesine mán berildi.

Memleket basshysy «Týrgýndı – Gerat – Kandagar – Spın-Býldak» temir jol qurylysynyń jobasyna nazar aýdaryp, atalǵan joba tabysty júzege assa, kólik baǵyttaryn ártaraptandyrýǵa, eksport naryqtaryn keńeıtýge jol ashatynyn aıtty. Sonymen qatar Soltústik – Ońtústik baǵytyndaǵy tranzıt áleýetin arttyrýda «Qazaqstan – Túrikmenstan – Iran» temir jol magıstraly men qurylysy júrip jatqan «Túrikmenbashy – Garabogaz – Qazaqstan shekarasy» avtokólik joly mańyzdy ról atqarady.

Budan bólek, kezdesýde bilim berý, tsıfrlandyrý salalaryndaǵy ózara tıimdi yqpaldastyq máseleleri talqylandy. Qazaqstan tarapy Túrikmenstanǵa memlekettik qyzmetterdi tsıfrlandyrý, sondaı-aq IT-mamandardyń biliktiligin arttyrý isinde jan-jaqty kómek kórsetýge daıyn ekenin jetkizdi.

Ózara saýda-sattyq kólemin 1 mıllıard dollarǵa jetkizý úshin baılanystardy damytýdyń tyń múmkindikterin qarastyrý qajettigi atap ótildi.

Aıta keteıik, keshe, 22 sáýir kúni Qazaqstanǵa Túrikmenstan Halk Maslahatynyń Tóraǵasy Gýrbangýly Berdimuhamedov keldi.

Taraptar Qoja Ahmet ıAsaýı kesenesine zııarat etti.

Qasym-Jomart Toqaev pen Gýrbangýly Berdimuhamedov «Etnoaýyl» keshenine bardy.