Qazaqstan Túrikmenstanda ulttyq taǵamdary men mádenı murasyn tanystyrdy

Aýqymdy festıval TMD memleketteri basshylarynyń Túrikmenstanǵa sapary aıasynda uıymdastyryldy. Іs-sharaǵa Qazaqstan Prezıdenti Qasym-Jomart Toqaev pen Dostastyq elderiniń kóshbasshylary qatysty.

Qazaqstan pavılony qonaqtardy elimizdiń ár óńirine gastronomııalyq saıahat jasaýǵa shaqyratyn erekshe formatta ázirlendi. Ekspozıtsııanyń negizgi ıdeıasy qazaq halqynyń qonaqjaılylyǵy, jomarttyǵy men birligin bildiretin dastarhan uǵymyna negizdeldi.

Pavılonda Qazaqstannyń tabıǵı landshafttary, dástúrli taǵamdary men zamanaýı damý baǵyttary ózara úılestirildi.

Atap aıtqanda, Saryarqanyń keń-baıtaq astyq alqaptary men molshylyqtyń sımvolyna aınalǵan baýyrsaqtar, qazaqtyń kórkem jaılaýlary men ulttyq et taǵamdary usynyldy. Qonaqtar besbarmaq, sirne jáne qazaq etinen daıyndalǵan taǵamdarmen tanysty.

Sondaı-aq ekspozıtsııada Іle Alataýynyń baýraıynda ósetin áıgili Almaty aporty men elimizdiń soltústigindegi tabıǵaty kórkem Býrabaı óńirine erekshe oryn berildi.

Qazaqstan pavılonynyń taǵy bir ereksheligi – Kaspıı teńiziniń gastronomııalyq murasyn tanystyrý boldy.

Munda brend-shef «Pıatımınýtka» ýyldyryǵyn jyldam tuzdaý tásilin kórsetip, arnaıy aspazdyq shoý uıymdastyrdy. Qonaqtarǵa balyqtan ázirlengen delıkatester men fıshbarmaq usynyldy.

Ekspozıtsııanyń qorytyndy bóliginde Qazaqstannyń tarıhı murasynan zamanaýı tehnologııalarǵa deıingi damý joly kórsetildi. Atap aıtqanda, «Tsıfrlyq Qazaqstan» bastamasy men Alatau City jobasynyń tanystyrylymy ótti.

Festıval aıasynda Kazakh Tourism ulttyq kompanııasy qazaq ashanasyn halyqaralyq deńgeıde tanystyrý jumystaryn úılestirdi.

Qazaqstannyń qonaqjaılylyq salasyndaǵy jetekshi ókilderi de sharaǵa qatysty. Atap aıtqanda, «Sandyq» etnomeıramhana-mýzeıi men avtorlyq qazaq ashanasyna mamandanǵan «Qazaq Gourmet» meıramhanasy ózderiniń tańdaýly taǵamdaryn usyndy.

– Mundaı deńgeıdegi is-sharalarǵa qatysý Qazaqstannyń halyqaralyq bedelin nyǵaıtý úshin strategııalyq mańyzǵa ıe. Elimizdiń týrıstik, mádenı jáne gastronomııalyq áleýetin TMD memleketteriniń birinshi basshylaryna tikeleı tanystyrý Qazaqstannyń álemdik arenadaǵy tanymaldyǵyn arttyrýǵa yqpal etedi. Bul elimizdiń ulttyq taǵamdaryn halyqaralyq deńgeıde nasıhattaýǵa múmkindik beredi. Sonymen qatar Qazaqstandy Ortalyq Azııadaǵy jetekshi gastrotýrızm ortalyqtarynyń biri retinde ornyqtyrýǵa baǵyttalǵan, – delingen Kazakh Tourism usynǵan aqparatta.

Festıvalde ulttyq taǵamdarmen qatar qazaq halqynyń kóshpeli mádenıeti de tanystyryldy.

Kazakh Tourism bastamasymen jáne Týrızm jáne sport mınıstrliginiń qoldaýymen is-shara alańyna qazaqtyń qumaı tazylary men búrkitshiler ákelindi.

Qonaqtarǵa halqymyzdyń saıatshylyq dástúri, qyran quspen ań aýlaý óneri men tazynyń qazaq mádenıetindegi orny kórsetildi. Bul kóshpeli órkenıettiń ǵasyrlar boıy qalyptasqan dástúrlerin halyqaralyq deńgeıde tanystyrýǵa múmkindik berdi.

Uıymdastyrýshylardyń málimetinshe, osyndaı halyqaralyq is-sharalarǵa qatysý Qazaqstannyń týrıstik jáne mádenı áleýetin ilgeriletý úshin mańyzdy.

Ásirese ulttyq taǵamdar arqyly eldiń tarıhyn, tabıǵatyn, turmys-tirshiligi men dástúrin tanystyrý sheteldik qonaqtardyń Qazaqstanǵa degen qyzyǵýshylyǵyn arttyrýǵa baǵyttalǵan.

Sonymen qatar gastronomııalyq týrızmdi damytý elimizdiń óńirlik erekshelikterin halyqaralyq deńgeıde nasıhattaýǵa jáne Qazaqstandy Ortalyq Azııadaǵy tartymdy týrıstik baǵyttardyń biri retinde tanytýǵa yqpal etedi.

Aıta keteıik, buǵan deıin Túrikmenstandaǵy ulttyq taǵamdar festıvalinde Qazaqstannyń 25-ten astam aýyl sharýashylyǵy jáne tamaq ónerkásibi kásiporny óz ónimderin tanystyrǵan bolatyn.

Kazınform

https://kaz.inform.kz/news/kazakstandik-25-ten-astam-ondrushnn-onm-turkmenstandagi-kormege-koyildi-80c62b58/