Qazaqstan — Túrikmenstan — Iran arqyly júk tasymaldaý kólemi 2030 jylǵa qaraı eki esege deıin artýy múmkin
ASTANA. KAZINFORM — Qazir Qytaı men Eýropa arasyndaǵy júk tasymalynyń 85 paıyzy Qazaqstan arqyly ótedi. Bul týraly Qasym-Jomart Toqaev Qazaqstan-Iran bıznes forýmynda aıtty.
Qasym-Jomart Toqaevtyń sózinshe, ekonomıkalyq yqpaldastyqty nyǵaıtý jolynda Qazaqstan-Iran úkimetaralyq komıssııasy aıryqsha ról atqarýǵa tıis.
Elimizde ınvestorlarǵa qolaıly orta qalyptastyrý úshin naqty sharalar qolǵa alyndy. Arnaıy Investıtsııalyq shtab quryldy. «Bir tereze» qaǵıdatymen jumys isteıtin Ulttyq tsıfrlyq platforma qoldanysqa engizilip jatyr. Qazaqstan Iranmen birlesip, túrli jobalar ázirleýge daıyn.
Memleket basshysy eki eldiń yqpaldastyǵyn damytýǵa tyń serpin beretin salalarǵa toqtaldy. Sonyń ishinde kólik-logıstıka baǵytyndaǵy yntymaqtastyqty nyǵaıtý óte ózekti.
— Qazaqstan — Eýrazııa keńistigindegi negizgi kólik-logıstıka habynyń biri. Qazir Qytaı men Eýropa arasyndaǵy júk tasymalynyń 85 paıyzy bizdiń elimiz arqyly ótedi. Qazaqstan tranzıttik áleýetin odan ári arttyrýǵa basa mán beredi. Sondyqtan biz Irandy asa mańyzdy seriktes retinde qarastyramyz. Osy rette, port termınaldaryn damytý, logıstıkany jetildirý jáne tranzıttik júk kólemin ulǵaıtý úshin birlesip jumys isteýge daıynbyz. Qazirdiń ózinde ortaq jobalar júzege asyryla bastady. Mysaly, elimiz Shahıd Radjaı portynda kólik-logıstıka termınalyn salýdy josparlap otyr. Bul nysan Qazaqstan taýarlaryn álem naryqtaryna tikeleı jetkizýge jol ashady. Biz Aqtaý jáne Quryq porttaryn Irannyń Ámirábad, Anzalı porttarymen baılanystyrýǵa múddelimiz. Sondaı-aq Bandar-Abbas, Chabahar porttarymen seriktestik ornatýǵa nıettimiz. Qazaqstan úshin Ortalyq Azııany Parsy shyǵanaǵymen jalǵaıtyn mýltımodaldi dálizderdi damytý mańyzdy. Osy rette Qazaqstan — Túrikmenstan — Iran temir joly erekshe ról atqarady. Bul baǵdar arqyly júk tasymaldaý kólemi 2030 jylǵa qaraı eki esege deıin artýy múmkin. Al munyń ekonomıkalyq áseri zor bolatyny anyq. Aımaqtaǵy saýda-sattyqtyń jandanýy jańa ındýstrııalyq jobalardy qolǵa alýǵa múmkindik beredi. Sonymen qatar servıstik ortalyqtar men óndiris alańdaryn ashýǵa jaǵdaı jasaıdy, — dedi Prezıdent.
Toqaev Irannyń Solico Group kompanııasy elimizde jylyna 200 myń tonna ónim shyǵaratyn sút kombınatyn salatynyn aıtty. Qasym-Jomart Toqaev aýyl sharýashylyǵy salasyndaǵy yqpaldastyqty damytý qajettigine nazar aýdardy.
— Iran — Qazaqstan astyǵyn satyp alatyn negizgi eldiń biri. Byltyr agroónerkásip keshenindegi taýar aınalymy 220 mıllıon dollarǵa jetti. Al bıylǵy on aıdyń ishinde astyq saýdasy 280 mıllıon dollarǵa jýyqtady. Biz aýyl sharýashylyǵyna ınvestıtsııa salatyn kásipkerlerdi qoldaımyz. Qazirgi tańda birqatar birlesken joba júzege asyrylyp jatyr. Máselen, Irannyń Solico Group kompanııasyn erekshe atap ótýge bolady. Bul kompanııa elimizde jylyna 200 myń tonna ónim shyǵaratyn sút kombınatyn salýdy josparlap otyr. Sondaı-aq balalarǵa arnalǵan taǵam ónimderin daıarlaý isin qolǵa almaqshy. Buǵan qosa, Kourosh Food Industry kompanııasy Qazaqstan naryǵyna qyzyǵýshylyq tanytyp otyrǵanyn bilemiz. Osy kompanııa elimizde ósimdik maıyn shyǵaratyn jáne qus sharýashylyǵyn damytatyn kásiporyndar ashqysy keledi. Taǵy da atap ótkim keledi: biz yntymaqtastyq ornatýǵa qashanda daıynbyz. Sondyqtan Iran kásipkerlerin birlesip jumys isteýge, Qazaqstanda zamanaýı óndirister ashýǵa shaqyramyn, — dedi Memleket basshysy.
Osyǵan deıin Qasym-Jomart Toqaev pen Masýd Pezeshkıan Qazaqstan-Iran bıznes forýmyna qatysqanyn jazǵan edik. Shara barysyndaToqaev qazaq-ıran qarym-qatynasyn nyǵaıtýǵa zor úles qosyp kele jatqan Prezıdent Masýd Pezeshkıanǵa alǵys aıtty.