Qazaqstan Túrkııanyń saıasatyn qoldaıdy - Nursultan Nazarbaev
«Qazaqstan men Túrkııa ejelden Uly jibek jolyn toǵystyryp kele jatqan elder. Bul ıgi isti odan ary jalǵastyrýymyz qajet. Buǵan oraı túrik ınvestorlaryn Baký-Tıbılısı-Kars temir jolymen jalǵasqan Aqtaý-Quryq kólik-logıstıkalyq habtaryn belsendi damytýǵa at salysýǵa shaqyramyn»,- dep atap ótti Memleket basshysy.
Elbasy bul jolǵa qatysty kópten beri jumys júrgizilgenin basa aıtty.
«Júk tasýdyń, qarym-qatynastyń jańa dálizi ornady dep sanaýǵa bolady. Muny paıdalanýymyz kerek. Búgingi kelissózder barysynda biz elderimiz arasyndaǵy tranzıt-kóliktik, munaı-gaz, áskerı tehnıkalyq, aýyl sharýashylyǵy, týrızm, mádenıt, bilim, ǵylym, tehnologııa salalaryndaǵy qatynasty talqylaǵanymyzdy baýyrym Erdoǵan myrza aıtyp ketti. Atalǵan baǵyttardy odan ary ilgeriletý maqsatymen yqpaldastyqty odan ary damytýǵa ýaǵdalastyq. Jalpy Qazaqstan men Túrkııanyń qarym-qatynasyn barlyq salada nyǵaıtý úshin mol múmkindikter bar. Barlyq salada, halyqaralyq jaǵdaıda, barlyq jerde de Qazaqstan Túrkııanyń saıasatyn qoldaıdy», - dedi Nursultan Nazarbaev.
Memleket basshysy Túrkııanyń Qazaqstannyń Táýelsizdik jyldarynyń birinshi kúninen bastap qoldap kele jatqanyn da atap ótti.
«Biz ony eshqashan umytpaımyz. 1991 jyly 16 jeltoqsanda, saǵat 16-da Parlamentimiz Qazaqstandy táýelsiz el dep jarııalady. Eki saǵattan keıin sol kezdegi Túrkııanyń Prezıdenti marqum Turǵyt Ózal myrza maǵan telefon shalyp: «Túrkııa memleketi Qazaqstannyń Táýelsizdigin qoldaıdy» dep aıtty. Bul bizdi qoldaǵan dúnıedegi eń birinshi memleket edi. Sodan beri qoldap kele jatyr, sodan beri qarym-qatynasymyz bir úzilgen emes. Sol úshin zor rızashylǵymyzdy esh ýaqytta umytpaımyz. Sodan beri qol jetkizgen kóp tabystar, kóp múmkindikter bar. Osy kelissózderimiz eki eldiń dostyǵynyń, birliginiń jarqyn mysaly bolyp sanalady. Osy jolmen barlyǵymyz júrýimiz kerek», - dedi Qazaqstan Prezıdenti.