Qazaqstan Túrkııanyń medıtsınalyq derekterdi basqarý salasyndaǵy tájirıbesin qoldanýǵa múddeli
ASTANA. KAZINFORM — Qazaqstan Túrkııanyń medıtsınalyq derekterdi basqarý salasyndaǵy tájirıbesin qoldanýǵa múddeli. Bul týraly Úkimet úıinde Túrkııa Vıtse-prezıdenti Jevdet Iylmazben Saýda-ekonomıkalyq yntymaqtastyq jónindegi komıssııanyń 14-otyrysyn ótkizip jatqan Premer-mınıstr Oljas Bektenov aıtty.
— Densaýlyq saqtaý salasyndaǵy qazaq-túrik qatynastaryna erekshe mán beremiz. Biz qazaqstandyq medıtsına qyzmetkerleri úshin mamandandyrylǵan oqytýdy uıymdastyrý boıynsha túrik tarapynyń qoldaýyn joǵary baǵalaımyz. Atap aıtqanda, apattar medıtsınasy, shuǵyl jáne jedel medıtsınalyq kómek salalarynda 40-tan astam qazaqstandyq mamandy oqytý josparymyz bar. Eki eldiń medıtsınalyq ýnıversıtetteri arasynda akademııalyq almasý baǵdarlamalaryn keńeıtý, sondaı-aq qazaqstandyq dárigerlerdiń Túrkııanyń jetekshi klınıkalarynda taǵylymdamadan ótýin damytý biz úshin mańyzdy, — dedi Oljas Bektenov.
Úkimet basshysynyń aıtýynsha, búginde Qazaqstan men Túrkııa arasyndaǵy densaýlyq saqtaý salasyndaǵy ınvestıtsııalyq yntymaqtastyq oń serpin kórsetip otyr.
— Qazirgi tańda aýrýhanalar qurylysy, onkologııalyq ınfraqurylymdy damytý, sondaı-aq ýnıversıtettik klınıkalar men farmatsevtıkalyq óndiristi damytý jobalary iske asyrylyp jatyr. Álemdegi úzdik júıelerdiń biri sanalatyn e-Nabyz aqparattyq platformamen tanystyq. Atalǵan joba shynymen qyzyǵýshylyǵymyzdy týdyrdy. Biz Túrkııa Respýblıkasynyń medıtsınalyq derekterdi basqarý salasyndaǵy tájirıbesin zerdeleýge jáne ony is júzinde qoldanýǵa múddelimiz, — dedi Premer-mınıstr.
Aıta keteıik, Qazaqstan túrik ınvestorlaryna birlesken jobalardy iske asyrý úshin memlekettik qoldaý quraldaryn usynýǵa daıyn.
