Qazaqstan Túrkııamen yntymaqtastyqty nyǵaıtýdy jalǵastyrady – Álıhan Smaıylov

NUR-SULTAN. QazAqparat - Qazaqstan Respýblıkasynyń Premer-Mınıstri Álıhan Smaıylov Túrkııa Respýblıkasynyń vıtse-Prezıdenti Fýat Oktaımen telefon arqyly sóılesti. QazAqparat bul týraly primeminister.kz saıtyna silteme jasap habarlaıdy.

Túrkııa vıtse-Prezıdenti F. Oktaı Á. Smaıylovty Qazaqstan Respýblıkasynyń Premer-Mınıstri laýazymyna taǵaıyndalýymen quttyqtady.

F. Oktaı qańtarda bolǵan qaıǵyly oqıǵa saldarynan qaza tapqandardyń otbasylaryna kóńil aıtyp, Túrkııa Qazaqstanǵa qajetti qoldaý kórsetýge daıyn ekenin atap ótti.

«Túrkııa Respýblıkasy – Qazaqstannyń senimdi ári strategııalyq seriktesi. Qazaqstan Úkimeti yntymaqtastyqtyń barlyq baǵyty boıynsha Túrkııamen yntymaqtastyqty nyǵaıtýdy jalǵastyrady», — dedi Á. Smaıylov.

Túrkııa – Qazaqstannyń mańyzdy saýda-ekonomıkalyq seriktesi. 2021 jyldyń 11 aıynyń qorytyndysy boıynsha ózara saýda kólemi 3,74 mlrd dollardy qurady. Bul 2020 jyldyń sáıkes kezeńindegi kórsetkishten 32% artyq jáne 2019 jylǵy pandemııaǵa deıingi deńgeıden anaǵurlym asyp túsedi. QR Táýelsizdik jyldarynda Túrkııa Qazaqstan ekonomıkasyna shamamen 5 mlrd dollar ınvestıtsııa saldy, Qazaqstannyń Túrkııaǵa salǵan ınvestıtsııa kólemi 1,1 mlrd dollardy qurady.

Bıyl Qazaqstan men Túrkııa arasyndaǵy dıplomatııalyq qarym-qatynastyń ornaǵanyna 30 jyl tolady.