Qazaqstan-Túrkııa Joǵary deńgeıdegi strategııalyq yntymaqtastyq keńesiniń 5-shi otyrysy ótti

ANKARA. KAZINFORM – Qasym-Jomart Toqaev pen Rejep Taııp Erdoǵan Qazaqstan-Túrkııa Joǵary deńgeıdegi strategııalyq yntymaqtastyq keńesiniń 5-shi otyrysyn ótkizdi. Bul týraly Aqordanyń baspasóz qyzmeti habarlady. 

Jıyn barysynda Memleket basshysy Túrkııanyń ejelden baýyrlas, tamyrlas jáne túbi bir týysqan el ekenin atap ótip, ortaq tarıhı jáne rýhanı qundylyqtarǵa negizdelgen qazaq-túrik yntymaqtastyǵy keńeıtilgen strategııalyq seriktestik rýhynda turaqty damyp kele jatqanyna nazar aýdardy. 

– Biz osy sara joldy jalǵastyryp, ózara baılanysty búgingiden de bıik beleske kóterýge múddelimiz. Qurmetti Prezıdent myrza, Ózińizben jańa ǵana shaǵyn quramda ótkizgen kelissózderdi joǵary baǵalaımyn. Biz yqpaldastyǵymyzdy keńeıtýge nıetimiz bar ekenin taǵy da bekemdeı tústik. Oǵan bizdiń múmkindigimiz de, ynta-jigerimiz de jetkilikti. Eki eldiń arasynda aýqymdy sharttyq-quqyqtyq negiz qalyptasty. Atap aıtqanda, alpystan astam ekijaqty sharttar men kelisimder bar. Búgin de birqatar ekijaqty kelisimge qol qoıylady, - dedi Memleket basshysy.  

Keńeste ózara saýda-sattyq kólemin ulǵaıtý máselesi talqylandy. Byltyr ózara saýda aınalymy 5 mıllıard dollar bolǵan. Bul kórsetkishti eseleýge barlyq múmkindik bar. Qasym-Jomart Toqaevtyń aıtýynsha, elimiz Túrkııa naryǵyna keminde 34 túrli ónim jetkizýge daıyn. Onyń kólemi 1 mıllıard dollarǵa jýyqtaıdy. Túrkııadan keletin taýar túrlerin de arttyra túsý mańyzdy.  

Taraptar taýar aınalymyn ulǵaıtý jolynda kólik-logıstıka salasynyń mańyzy aıryqsha ekenin atap ótti. Bul rette Qazaqstan Prezıdenti Transkaspıı halyqaralyq kólik baǵdaryn damytýǵa basa mán berilip otyrǵanyn jetkizip, zamanaýı temirjol, qurlyqtaǵy porttar men júk termınaldaryn salýǵa jáne keme óndirisine túrik ınvestıtsııasyn tartýǵa múddeli ekenimizdi málimdedi.  

Buǵan deıin Qasym-Jomart Toqaev pen Rejep Taııp Erdoǵanmen kelissóz júrgizgenin jazǵan edik.