Qazaqstan-Túrkııa taýar aınalymyn $10 mlrd jetkizýge bolady - Mevlıýt Chavýshoǵlý

NUR-SULTAN. QazAqparat - Qazaqstan men Túrkııa arasyndaǵy taýar aınalymynyń aýqymyn 10 mlrd dollarǵa jetkizýge bolady. Mundaı áleýettiń baryn elordada QR Syrtqy ister mınıstri Beıbit Atamqulovpen kezdesýde Túrkııa Syrtqy ister mınıstri Mevlıýt Chavýshoǵlý aıtyp otyr, dep habarlaıdy QazAqparat tilshisi.

«Biz ekijaqty qarym-qatynasty barynsha nyǵaıta beremiz. Meniń qurmetti baýyrym (Beıbit Atamqulov - avt.) aıtqandaı, ortaq baılanysymyzdy kúsheıte berýimiz kerek. Túrki áleminiń aqsaqaly Nursultan Nazarbaev pen bizdiń Prezıdent Erdoǵan bizge naqty tapsyrmalardy júktedi. Osy qoıylǵan mejelerdi baǵyndyrǵan durys. Biz eki el arasyndaǵy taýar aınalymyn 5 mlrd dollarǵa jetkizgimiz keledi. Biraq, jaqsy jumys atqara bilsek, bul kórsetkishti 10 mlrd dollarǵa jetkizýge bolatyndaı áleýet bar», - dedi Túrkııa Syrtqy ister mınıstri Mevlıýt Chavýshoǵlý.

Aıta ketsek, Elbasy Nursultan Nazarbaev pen Túrkııa Prezıdenti Rejep Taıyp Erdoǵan buǵan deıin ekijaqty taýar aınalymyn 5 mlrd dollarǵa deıin kóterý maqsatyn qoıǵan edi.

Eske sala ketsek, atalmysh kezdesýde Beıbit Atamqulov ekijaqty taýar aınalymyn 5 mlrd dollarǵa jetkizýde jumystyń nátıjeleri baıqalǵanyn atap ótken edi.

«Bıylǵy jyldyń alǵashqy toqsanynda ekijaqty taýar aınalymy aldyńǵy jyldyń osyndaı merzimimen salystyrǵanda 50 paıyzdan astam ósimdi kórsetip, 632 mln dollarǵa jetkenin atap ótkim keledi. Qazirgi ýaqytta Qazaqstan ekonomıkasynyń túrli salalarynda túrik kapıtalynyń qatysýymen 2200-den astam kásiporyn jumys isteıdi. Biz «Jańa sınergııa» birlesken ekonomıkalyq baǵdarlamany iske asyrý jónindegi is-sharalar josparyn jandandyrýǵa ýaǵdalastyq», - dedi Beıbit Atamqulov.