Qazaqstan Túrkııa tarapynan «Almaz tourizm» klıentterine kómek kórsetýdi ótindi
ASTANA. QazAqparat - QR IJTM Týrızm ındýstrııasy komıteti Túrkııa Respýblıkasynyń Mádenıet jáne týrızm mınıstrliginen qazaqstandyq «Almaz tourizm» týrıstik operatoryna qoldaý kórsetýdi ótindi, dep habarlady vedomstvonyń baspasóz qyzmetinen.
Vedomstvonyń aqparatyna qaraǵanda, Túrkııada demalyp jatqan qazaqstandyq týrıster birqatar qonaqúı ókilderimen aradaǵy ahýaldyń qıyndaýyna baılanysty komıtetke aryz joldaı bastaǵan. Osyǵan oraı komıtet tóraǵasy Marat Iǵalıev Túrkııanyń Mádenıet jáne týrızım mınıstrligine «Almaz tourizm» týrıstik operatorynyń klıentterine qoldaý kórsetý ótinishin joldaǵan.
«Týrızm ındýstrııasy komıteti Túrkııa Respýblıkasynyń Mádenıet jáne týrızm mınıstrliginen Túrkııanyń jekelegen mekemelerimen oryn alǵan ahýalǵa baılanysty qazaqstandyq týrıster úshin zańdy sheshimniń oryn alýyna qol ushyn berýdi suraıdy», - delingen habarlamada.
Sondaı-aq komıtet «Trek Travel International» kompanııasynyń basshylyǵyna da hat jazdy. Onda kompanııa qonaqúılerinde turý úshin qazaqstandyq týrısterden qaıta tólem talap etýge jol bermeý qajetti aıtylǵan.
«Vedomstvo eki kommertsııalyq kompanııasynyń arasynda oryn alyp otyrǵan daýǵa túsinistikpen qaraýdy suraıdy jáne týrısterge kelisimshartqa sáıkes qyzmet kórsetýdi talap etedi», - delingen habarlamada.
