«Qazaqstan-Túrkııa: Strategııalyq áriptestiktiń jańa áleýeti» - respýblıkalyq basylymdarǵa sholý

***

«Keshe Aqordada Qazaqstan Respýblıkasynyń Prezıdenti Nursultan Nazarbaev Qazaqstanda resmı saparmen júrgen Túrik Respýblıkasynyń Prezıdenti Abdýlla Gúlmen kezdesti», dep jazady «Egemen Qazaqstan» gazeti sársenbilik nómirinde jaryq kórgen «Qazaqstan-Túrkııa: Strategııalyq áriptestiktiń jańa áleýeti» maqalasynda. Saýda-ekonomıkalyq qatynastardy damytýǵa baılanysty Qazaqstan Prezıdenti birqatar máselelerdi ortaǵa saldy. Onyń ishinde Qazaqstan men Túrkııa arasyndaǵy úkimetaralyq komıssııanyń jumys tıimdiligin arttyrý qajettigine nazar aýdardy. Óıtkeni, 2008 jyly eki memleket arasyndaǵy taýar aınalymy 2 mıllıard 900 mıllıon dollardy quraǵan bolsa, ótken jyly bul 1 mıllıard 400 mıllıon dollarǵa deıin tómendegen. Al óz kezeginde Túrkııa Prezıdenti Abdýlla Gúl óziniń saparyn kıeli Túrkistannan bastaǵanyn, onda alǵash ret bolǵanyn aıta kelip, Qazaqstan - Túrkııa yntymaqtastyǵynyń damý jaıyna toqtalǵan.

Sonymen qatar osy kúni eki el basshylary qazaq-túrik bıznes-forýmynyń jumysyna qatysqan. Alqaly jıyn barysynda Elbasy N.Nazarbaev Qazaqstan, Belarýs jáne Reseı Keden odaǵynyń qurylýymen túrkııalyq ınvestorlar úshin múmkindikter ashylatynyna nazar aýdaryp, «bul - 170 mıllıonǵa jýyq adamy bar, jalpy ishki óniminiń jıyntyǵy 2 trıllıon dollardy quraıtyn biryńǵaı taýarly rynok», dese, Túrkııa Prezıdenti Qazaqstannyń ekonomıkalyq damý deńgeıin joǵary baǵalap, Qazaqstannyń elordasy - jańa Astana qurylysynyń qarqynyna tańdanysyn bildirgen. A.Gúl «Qazaqstan Azııanyń júregi ǵana emes, sondaı-aq, osy óńirdegi jaryq juldyz, - dep atap ótken.

Osy eki maqalany da basylymnyń, sonymen qatar «Aıqyn», «Alash aınasy», «Lıter», «Ekspress-K», «Izvestııa-Kazahstan» gazetteriniń sársenbilik sanynan egjeı-tegjeıli oqı alasyzdar.

Keshe QR Bas prokýratýrasynyń kezekti alqa májilisi ótip, onda jol qaýipsizdigin qamtamasyz etý máseleleri, sondaı-aq jekelegen memlekettik organdardaǵy ákimshilik zańdardy qoldanýdaǵy zańdylyqtyń jáı-kúıi qarastyryldy. Osyǵan oraı «Egemen Qazaqstan» gazetiniń búgingi nómirinde «Kemshilikter men qaıshylyqtar kóp» degen taqyryppen maqala jaryq kórdi. «Quzyretti organdardyń qoldanyp otyrǵan sharalaryna qaramastan, avtomobıl qozǵalysy salasynda apatty jaǵdaılar men adam shyǵyndary túbegeıli joıylmaı otyr. Osyǵan oraı, jıynǵa qatysýshylar qaralyp otyrǵan máseleniń jáne oǵan qatysty zańdardy odan ári jetildirýdiń, ýákiletti memlekettik organdardyń qyzmetteriniń tıimdiligin kóterýdiń ózektiligin atap kórsetti. Jol polıtsııasy organdarynyń apattylyqtyń jalpy kórinisin beretin esepke alý, tirkeý jumysyndaǵy eleýli kemshilikteri de qadap aıtyldy», dep jazady basylym.

***

Jaz kelse kópshilik jazǵy demalysqa shyǵyp, demalýǵa asyǵady. Alaıda bıyl elimizdiń demalýshylary úshin bul demalys qymbatqa túsetin túri bar. Onyń birinshi sebebi kórshi qyrǵyz eli men Taılandtaǵy ishki dúrbeleń bolsa, ekinshisi osy sátti tıimdi paıdalanǵan Túrkııanyń týrıstik saıasaty bolyp otyr. Al oǵan qarsy turar otandyq týrızm turalap tur. Qolda bar demalys oryndarynyń qyzmet kórsetý sapasy tómen, baǵasy qymbat. Bul másele tóńireginde keńirek «Alash aınasy» gazetiniń búgingi sanyndaǵy «Qyrǵyzdar qyrqysyp, Taıland týlap jatyr. Biz qaıda demalamyz?» degen maqaladan tolyq tanysa alasyzdar.

Elimizdiń Qylmystyq Kodeksiniń 195-baby jumys istemeı otyr. Zańda «Ujym basshysy nemese jeke adam moınyndaǵy iri kólemdegi qaryzdy, ne bolmasa nesıe bereshegin tólemese qylmystyq jaýapqa tartylady, oǵan 200-den 500 aılyq eseptik kórsetkish kóleminde aıyppul salynyp, alty aıdan eki jylǵa bas bostandyǵynan aıyrý jazasy qoldanylady» delingenmen naqty ómirde bul bap qoldanylmaıdy. Onyń nege oryndalmaıtyndyǵynyń eki sebebi bar. Ol qandaı sebepter ekendigin egjeı-tegjeıli bilgińiz kelse «Alash aınasy» gazetiniń búgingi sanyna nazar aýdaryńyz.

Osy basylymnyń turaqty «Oı-kókpar» aıdarynyń sársenbilik saýaly - «Arnaıy zań qabyldamaıynsha, ulttyq sport túrlerin damyta alamyz ba?». Saýalnamaǵa QR Ulttyq at sporty federatsııasynyń prezıdenti Sádibek Túgel men ardager sport qaıratkeri Qasym Ilıashev qatysyp, tushymdy jaýap bergen.

***

«Aıqyn» gazetiniń elimizdiń Qarjy polıtsııasyna silteme jasap habarlaýynsha, Ekonomıkalyq jáne sybaılas jemqorlyqqa qarsy kúres agenttiginiń qyzmetkerine para bermekshi bolǵan aýyl sharýashylyǵy mınıstrliginiń laýazymdy qyzmetkeri Serik Súleımenov sottyń sanktsııasymen qamaýǵa alyndy. «Laýazymdy sheneýniktiń qyzmet kabınetin tintý kezinde S.Súleımenovtyń jeke seıfinen shyqqan 123,4 myń dollar jáne 5,4 mln. teńge tárkilengen. Para retinde bergen aqshalardyń serııalyq nómirleri seıfte jatqan aqshalardyń nómirlerimen jalǵasady eken. Qazir aýyl sharýashylyǵy mınıstriginiń komıteti tóraǵasy Serik Súleımenov qamaýǵa alynyp, tergeý júrgizilip jatyr», dep jazady basylym.

Osy basylymnyń dástúrli «Aq sóıle!» aıdarynyń búgingi qonaǵy - «QazAgroınnovatsııa» AQ Qoı sharýashylyǵy ǵylymı-zertteý ınstıtýtynyń dırektory, aýyl sharýashylyǵy ǵylymdarynyń doktory Serik Ospanov. Qoı sharýashylyǵy tóńireginde órbigen ekeýara áńgime gazettiń sársenbilik nómirinde «Qoısyz elge kúı bitpeıdi, kókten kók qoshqardyń túsýi tegin emes» degen taqyryppen berilgen.

***

«Kazahstanskaıa pravda» gazetiniń jazýynsha Memleket basshysy N.Nazarbaev pen Túrkııa Respýblıkasynyń Prezıdenti Abdýlla Gúl Astanadaǵy birqatar nysandarda bolǵan. «Eki eldiń basshylary eń úzdik álemdik standarttar boıynsha salynǵan jáne jaraqtandyrylǵan «Qazaqstan» birege kınokontsert zalyn aralap kórdi. Odan keıin Nursultan Nazarbaev pen Abdýlla Gúl álemdegi eń bıik shatyr túrindegi ǵımarattyń biri sanalatyn «Han shatyr» biregeı kesheninde boldy», dep jazady basylym.

***

«Lıter» gazetiniń jazýynsha, búgin elordada «KADEX-2010» І Halyqaralyq qarý-jaraq jáne áskerı-tehnıkalyq múlik kórmesi ashylady. Atalǵan sharaǵa álemniń 20 elinen 200-ge jýyq kompanııa qatysyp, ІT-tehnologııalar, baılanys, tyldyq múlikter, medıtsına, sondaı-aq ınfraqurylym men qurylys bólimderi boıynsha qarý-jaraq jáne áskerı tehnıka salasyndaǵy jetistiktermen tanystyrady. Basylymnyń atap ótýinshe, ekspozıtsııanyń basym bóligin, ıaǵnı 100-den astam stendterde qazaqstandyq bıznes ókilderi Qazaqstannyń Qarýly Kúshteri qajettigi úshin shyǵarylatyn ónimderdi usynbaq.