Qazaqstan Túrkııa naryǵyna sıyr eti men astyq eksportyn keńeıtpek
ASTANA.KAZINFORM — Shanhaıda ótken «Bir beldeý, bir jol» bastamasy aıasynda azyq-túlik salasyndaǵy yntymaqtastyq jónindegi konferentsııa barysynda Qazaqstannyń Aýyl sharýashylyǵy mınıstri Aıdarbek Saparov Túrkııanyń aýyl sharýashylyǵy jáne orman sharýashylyǵy mınıstri Ibrahım ıÝmaklymen kezdesti. Bul týraly vedomstvonyń baspasóz qyzmeti málim etti.
Kezdesýdiń negizinen agroónerkásip salasyndaǵy ózara yntymaqtastyqty keńeıtý jáne ekijaqty saýdany damytýǵa nazar aýdaryldy.
Aıdarbek Saparov atap ótkendeı, atalǵan sala boıynsha Qazaqstan men Túrkııa arasyndaǵy strategııalyq áriptestik — eki el úshin de basym baǵyttardyń biri.
— Bizdiń memleket basshylary Qazaqstan men Túrkııa arasyndaǵy yntymaqtastyqty tereńdetýdiń strategııalyq mańyzdylyǵyn birneshe ret atap ótken. AÓK salasyndaǵy ózara tıimdi seriktestikti arttyrý týraly el basshylarynyń kelisimi bizdiń jumysymyzǵa aıqyn baǵdar berip otyr. 2025 jyldyń alǵashqy segiz aıynda aýyl sharýashylyǵy ónimderiniń taýar aınalymy 2,9%-ǵa ósip, 186,7 mıllıon AQSh dollaryna jetti. Qazaqstan Túrkııaǵa negizinen burshaq tuqymdas daqyldar, maqta talshyǵy, kebek jáne zyǵyr tuqymyn jetkizedi. Qazir biz taýar túrlerin keńeıtý jáne jetkizý kólemin ulǵaıtý baǵytynda birlesip jumys isteýge daıynbyz, — dedi mınıstr.
Kezdesý barysynda qazaqstandyq sıyr etin Túrkııa naryǵyna shyǵarýǵa aıryqsha kóńil bólindi.
Kóp jyldar boıy aýsyl, qus tumaýy jáne túıirshik dermatıtine (nodýlıarly dermatıt) baılanysty qoıylǵan shekteýler alynǵannan keıin, túrik sút kompanııalary qazaqstandyq naryqqa tabysty shyǵyp jatyr, al bizdiń eldiń sıyr eti Túrkııada joǵary suranysqa ıe bolýda.
Qazirgi tańda Qazaqstan kásiporyndary jyl saıyn 10 myń tonnadan astam sıyr etin eksporttaýǵa daıyn.
Sonymen qatar, Qazaqstan joǵary sapaly qatty bıdaıdyń (dýrým jáne hi-pro sorttary) eksklıýzıvti jetkizýshisi bolýǵa ázir ekenin bildirdi. Logıstıkany jeńildetý maqsatynda Bakın termınaly bazasynda «astyq habyn» qurý usynyldy.
«Azyq-túlik kelisimshart korporatsııasy» UQ» AQ túrik seriktesterimen birlesip, Qazaqstanda burshaq tuqymdas daqyldardy ósirý jobalaryn iske asyrýdy josparlap otyr. Forvardtyq qarjylandyrý baǵdarlamasy aıasynda fermerler joǵary sapaly tuqymmen jáne zamanaýı tehnologııalarmen qamtamasyz etiledi, al daıyn ónim Túrkııaǵa shyǵarylady.
Óz kezeginde, Ibrahım ıÝmakly Qazaqstannyń aýyl sharýashylyǵy salasynda senimdi seriktes retindegi joǵary áleýetin atap ótip, yqpaldastyqty tereńdetýge daıyn ekenin bildirdi.
Sonymen birge taraptar jańa eksporttyq baǵyttardy ashý úshin qajet veterınarııalyq jáne fıtosanıtarlyq rásimderdi jedeldetýdiń mańyzdylyǵyna toqtaldy. Bul, ásirese, qazaqstandyq sıyr eti men ózge de ónim túrlerin syrtqy naryqqa shyǵarýǵa jol ashady.
Buǵan deıin habarlanǵandaı, Qazaqstan 13,4 mln tonna astyq eksporttady. Bul sońǵy jıyrma jyldaǵy eń joǵary kórsetkish ekenin jazǵan bolatynbyz.