Qazaqstan – Túrkııa qarym-qatynasy strategııalyq seriktestik deńgeıine kóterildi - Elshi

ASTANA. QazAqparat –Qazaqstan – Túrkııa qarym-qatynasy strategııalyq seriktestik deńgeıine kóterildi. Bul týraly búgin Aqordada Memleket basshysy Qasym-Jomart Toqaevqa senim gramotasyn tapsyrǵannan keıin Túrkııa Respýblıkasynyń elshisi Mýstafa Kapýdjý aıtty, dep habarlaıdy QazAqparat tilshisi.

«Qazir ǵana qurmetti Prezıdent myrzaǵa senim gramotasyn tabys ettim. Biz taǵy bir márte respýblıkalarymyz arasyndaǵy yntymaqtastyqtyń nyǵaıa túsetindigin qýattaımyz. Qazaqstandaǵy jumysym barysynda ekijaqty qarym-qatynasty nyǵaıtý úshin bar kúsh-jigerimdi jumsaımyn. Túrkııa Qazaqstan Respýblıkasynyń táýelsizdigin alǵashqylardyń biri bolyp moıyndaǵan memleket jáne 31 jyl boıy ekijaqty qarym-qatynasty nyǵaıtyp keledi. Taıaýda respýblıkalarymyzdyń arasynda qol qoıylǵan qujat qarym-qatynasymyzdy strategııalyq seriktestik deńgeıine deıin kóteredi. Bizdiń yntymaqtastyǵymyz jedel qarqynmen damıtynyna senimdimiz. Óıtkeni, bizdiń halyqtarymyzdyń tili, mádenıeti uqsas», - dedi Túrkııa Elshisi.

Eske salaıyq, Qazaqstan Prezıdentine senim gramotalaryn Malaızııa elshisi Mohamad Adlı bın Abdýlla, Saýd Arabııasy Koroldiginiń elshisi Faısal ben Hanıf ál-Kahtanı, Túrkııa Respýblıkasynyń elshisi Mýstafa Kapýdjý jáne Iran Islam Respýblıkasynyń elshisi Álı Akbar Djoýkar tapsyrǵan edi.