Qazaqstan Túrkııa áskerılerimen birlesken oqý-jattyǵý ótkizedi

ASTANA. KAZINFORM — QR Qorǵanys mınıstrligi 2024 jylǵa josparlanǵan áskerı jattyǵýlar týraly túsinik berdi. 

Kazinform agenttiginiń resmı saýalyna bergen jaýabynda vedomstvo osy jylǵa josparlaǵan oqý-jattyǵýlardy jarııalady. Bul turǵyda Túrkııa Qarýly kúshterimen birlesken «Qabylan joly-2024» oqý-jattyǵýy, sondaı-aq Ázerbaıjan, Ózbekstan, Qyrǵyzstan jáne Tájikstan qarýly kúshteri bólimsheleriniń qatysýymen «Birlestik-2024» komandalyq-shtabtyq is-sharasy ótkizilmek.

Munymen qosa, bıylǵy josparda myna jıyndar bar:

• «Beket-2024» keshendi jattyǵýy;
• áýedegi shabýylǵa qarsy qorǵanystyń jedel-taktıkalyq «Ashyq aspan-2024» komandalyq-shtabtyq oqý-jattyǵýy;
• Kaspıı mańy memleketteriniń (Ázerbaıjan, Iran, Qazaqstan, Reseı) birlesken jattyǵýlary;
• jedel-taktıkalyq «Aıbalta-2024» komandalyq-shtabtyq oqý-jattyǵýy;
• «Tosqaýyl-2024» komandalyq-shtabtyq oqý-jattyǵýy.

«Bul jattyǵýlardyń burynǵylarynan aıyrmashylyǵyna toqtalsaq, oqý-jattyǵý tujyrymdamasy geosaıası jaǵdaıdy, óńirdegi jáne álemdegi ahýaldy eskere otyryp, jyl saıyn ózgeredi», - delingen mınıstrlik aqparatynda.

Sonymen qatar 2024 jyldyń qyrkúıek-qazan aılarynda Qazaqstan aýmaǵynda UQShU bitimger kúshterimen birlesken oqý-jattyǵýyn ótkizý josparlanǵan. Budan bólek, ekijaqty negizde Belarýs, Qyrǵyzstan, Tájikstan jáne Ózbekstan qarýly kúshterimen birlesken oqý-jattyǵýlar uıymdastyrylmaq.