Qazaqstan – Túrkııa áskerı yntymaqtastyǵynyń keleshegi talqylandy

ASTANA. QazAqparat – Qorǵanys vedomstvosynyń basshysy general-polkovnık Rýslan Jaqsylyqov Túrkııanyń Qazaqstandaǵy Tótenshe jáne ókiletti elshisi Mustafa Kapýdjýmen kezdesti, dep habarlaıdy QazAqparat mınıstrliktiń baspasóz qyzmetine silteme jasap.

Taraptar áskerı bilim berý, jaýyngerlik daıarlyq jáne bitimgerlik qyzmet salasyndaǵy áskerı yntymaqtastyqtyń qazirgi jaǵdaıy men keleshegin talqylady.

Odan bólek áskerı-tehnıkalyq yntymaqtastyq sheńberindegi ózara is-qımyl da aıtyldy. Sóz arasynda ótken jyldyń mamyr aıynda Qazaqstan men Túrkııa memleketteri basshylarynyń kezdesýi sheńberinde qol jetkizilgen ýaǵdalastyqtar negizinde josparly túrde damyp kele jatqanyn atap ótti.

Kezdesý sońynda general-polkovnık Rýslan Jaqsylyqov dıplomatqa «Mehteran» túrik áskerı orkestriniń «Astana – mádenıet kerýeni» I Halyqaralyq áskerı-mýzykalyq festıvaline qatysýyna qoldaý kórsetkeni úshin alǵysyn bildirdi. Ol beıbitshilik, yntymaqtastyq jáne tatý kórshilik ıdeıalaryn ilgeriletýdegi mádenıettiń mańyzdy ekenin atap ótti.