Qazaqstan túrki memleketteriniń jelilik medıtsınalyq ýnıversıtetin qurýdy usyndy
ASTANA. KAZINFORM - Bishkekte Túrki memleketteri uıymyna múshe elderdiń densaýlyq saqtaý mınıstrleriniń altynshy kezdesýinde Qazaqstan tarapy túrki memleketteriniń jetekshi medıtsınalyq ýnıversıtetterin biriktirip, dárigerlerdi birlesip daıarlaý, mamandar almasý jáne medıtsınalyq ǵylymdy damytý jóninde bastama kóterdi.
QR Densaýlyq saqtaý mınıstrligi baspasóz qyzmetiniń habarlaýynsha, yntymaqtastyqtyń jańa formattary jas medıtsına mamandaryn daıarlaý múmkindikterin keńeıtýge jáne óńir elderinde zamanaýı medıtsınalyq kómektiń qoljetimdiligin arttyrýǵa baǵyttalǵan.
-Qazaqstan Túrki memleketteriniń jelilik ýnıversıtetin qurýdy usyndy. Ol TMU elderiniń jetekshi medıtsınalyq joǵary oqý oryndaryn biriktiredi. Qoǵamdyq densaýlyq saqtaý, epıdemıologııa jáne bıoınformatıka salalaryn qosa alǵanda, bilim berý baǵdarlamalaryn birlesip ázirleý kózdelip otyr, – dedi QR Densaýlyq saqtaý mınıstri Aqmaral Álnazarova.
Osy jumysty úılestirý úshin TMU Hatshylyǵynyń janynan Medıtsınalyq bilim berý jónindegi úılestirý keńesin qurý usynyldy. Akademııalyq almasýǵa da erekshe nazar aýdaryldy. Qazaqstan jas ǵalymdarǵa, doktoranttar men rezıdent-dárigerlerge arnalǵan granttyq baǵdarlamany iske qosýdy, sondaı-aq suranysqa ıe medıtsınalyq mamandyqtar boıynsha birlesken taǵylymdamalardy damytýdy usyndy. Basym baǵyttardyń qatarynda balalar kardıohırýrgııasy, transplantologııa, neırohırýrgııa jáne onkogematologııa bar.
Qazaqstannyń ulttyq ǵylymı ortalyqtary men ýnıversıtettik klınıkalary TMU elderinen kelgen mamandardy praktıkalyq daıarlaý alańdary bolýǵa daıyn. Yntymaqtastyqta medıtsınalyq-sanıtarııalyq alǵashqy kómek pen otbasylyq medıtsınany damytýǵa erekshe oryn beriledi.
Qazaqstan aýyldyq jáne shekara mańyndaǵy aýdandarda jumys isteıtin dárigerler úshin birlesken bilim berý baǵdarlamalaryn, kóshpeli mektepter men qysqa merzimdi taǵylymdamalar uıymdastyrýdy usynady. Ónimdi áriptestiktiń praktıkalyq mysaly retinde Ózbekstan, Tájikstan jáne Qyrǵyzstanda ótken Qazaqstan medıtsınasy kúnderin atap ótýge bolady.
Memleketaralyq yntymaqtastyq sheńberinde dárigerler birlesken operatsııalar jasap, patsıentterge konsýltatsııalar berdi, zamanaýı medıtsınalyq tehnologııalardy qoldaný tájirıbesimen almasty. Mundaı ózara is-qımyl kásibı baılanystardy nyǵaıtýǵa, densaýlyq saqtaý salasyndaǵy mamandardyń praktıkalyq jáne ǵylymı áleýetin arttyrýǵa, sondaı-aq medıtsınalyq kómek kórsetýdiń úzdik praktıkalaryn birlesip engizýge múmkindik beredi. Qazaqstan osyndaı baǵdarlamalardy turaqty negizde ótkizýdi jáne birlesken medıtsınalyq mıssııalar praktıkasyn TMU-nyń basqa da memleketterine taratýdy usyndy.
Osyǵan deıin Qazaqstan túrki elderine dári-dármekti birlese satyp alýdy usynǵan bolatyn.
