Qazaqstan túrki memleketteriniń azamattaryn oqytýǵa arnaıy granttar bólýge daıyn
ASTANA. KAZINFORM – Joǵary oqý ornynda túrki memleketteriniń azamattaryn oqytý úshin arnaıy granttar bólýge daıynbyz. Bul týraly búgin Túrki memleketteri uıymynyń beıresmı sammıtinde Prezıdent Qasym-Jomart Toqaev málim etti.
– Bilim-ǵylym salasyna qajetti mamandar daıarlaıtyn oqý ortalyqtary men ǵylymı mekemeler kerek. Ózara tájirıbe almasý, birlesip kadrdar daıarlaý jáne ozyq tehnologııalardy engizý óte mańyzdy. Sondyqtan Túrki elderiniń jasandy ıntellekt ortalyqtarynyń jelisin qurýdy usynamyn. Biz Qazaqstanda jańa formattaǵy tehnologııalyq oqý orny – Jasandy ıntellekt ýnıversıtetin ashýdy josparlap otyrmyz. Joǵary oqý ornynda túrki memleketteriniń azamattaryn oqytý úshin arnaıy granttar bólýge daıynbyz, - dedi Qasym-Jomart Toqaev.
Prezıdenttiń aıtýynsha, baǵdarlamalaý, jasandy ıntellekt jáne ozyq tehnologııa salalary boıynsha túrki elderiniń jastary arasynda ǵylymı-tehnologııalyq olımpıada uıymdastyrǵan jón.
– Bul bastamalardy júzege asyrý úshin Túrki ınvestıtsııalyq qory tarapynan qarjylaı kómek kórsetýge bolar edi. Bıyl qor naqty jobalar boıynsha jumys isteý tásiline kóshti. Jarǵylyq kapıtaly 600 mln dollarǵa jetti. Ony ulǵaıtýǵa bolady. Bul - aıryqsha máni bar strategııalyq resýrs. Sol sebepti qor barlyq startapqa qoldaý kórsetip, ınfraqurylymdyq jobalardy iske asyrýǵa belsene atsalysady dep senemiz. Qor tolyqqandy qyzmet kórsetýi tıis. Múshe memleketterdi osy mindetti jedel júzege asyrýǵa shaqyramyn, - dedi Memleket basshysy.
Budan buryn habarlanǵandaı, búgin Túrkistan qalasynda Prezıdent Qasym-Jomart Toqaevtyń qatysýymen Túrki memleketteri uıymynyń beıresmı sammıti bastaldy. Sammıtke TMU-ǵa múshe memleketterdiń basshylary - Túrkııa prezıdenti Rejep Taııp Erdoǵan, Ózbekstan prezıdenti Shavkat Mırzıeev pen Qyrǵyzstan prezıdenti Sadyr Japarov, Ázerbaıjan prezıdenti Ilham Álıev keldi.
Jasandy ıntellekt jáne tsıfrlyq damý» taqyrybyna arnalǵan jıyn Qazaqstannyń tóraǵalyǵymen uıymdastyrylyp otyr.
