Qazaqstan Túrki memleketterine jastardy jat ıdeologııadan qorǵaý sharalaryn kúsheıtýdi usyndy
ASTANA. KAZINFORM – Ázerbaıjanda ótip jatqan Túrki álemi aptalyǵy aıasynda Túrki memleketteri uıymyna múshe elderdiń din máselelerine jaýapty memlekettik organdary basshylarynyń alǵashqy otyrysy ótti, dep habarlaıdy QR mádenıet jáne aqparat mınıstrliginiń baspasóz qyzmeti.
Jıynǵa TMU Bas hatshysy Kýbanychbek Ómirálıev, sondaı-aq Qazaqstan, Ázerbaıjan, Túrkııa, Qyrǵyzstan jáne Ózbekstannyń ókilderi qatysty.
Otyrys barysynda Qazaqstan Respýblıkasy Mádenıet jáne aqparat vıtse-mınıstri Rýstam Álı Qazaqstan úshin TMU aıasyndaǵy yntymaqtastyqtyń tájirıbe almasýǵa, konfessııaaralyq kelisimdi nyǵaıtýǵa jáne búgingi zamannyń máselelerin birlesip sheshýge múmkindik beretin mańyzdy alań ekenin atap ótti.
Kezdesýde jastardy jat ıdeologııanyń yqpalynan saqtandyrý máselesi kóterildi. Qazaqstan TMU-ǵa múshe memleketterge ınternet keńistigindegi qaýipsizdikti qamtamasyz etý jáne aldyn alý baǵytyndaǵy ortaq jumysty kúsheıtýdi usyndy. Jıyn sońynda qatysýshylar Túrki memleketteri uıymy aıasyndaǵy yntymaqtastyqty odan ári damytýǵa nıetti ekenin bildirdi.
Osyǵan deıin Májilis depýtaty Edil Jańbyrshın ishki saıasatta kemel adam qalyptastyratyn ıdeologııa bolýy tıistigi týraly aıtqanyn jazdyq.
