Qazaqstan Túrki memleketteri uıymy Joǵarǵy sottarynyń konferentsııasyna qatysty

ASTANA. KAZINFORM – QR Joǵarǵy Sotynyń tóraǵasy Aslambek Merǵalıev Túrki memleketteri uıymyna múshe Qazaqstan, Ózbekstan, Túrkııa, Ázerbaıjan jáne Qyrǵyzstannyń joǵarǵy sottarynyń tóraǵalaryna onlaın rejımde iltıpat bildirdi.

Túrkııanyń Antalııa qalasynda ótken forýmnyń ekinshi otyrysynyń jumysyna (birinshisi 2023 jyldyń aqpanynda Ázerbaıjanda ótken) quramynda Joǵarǵy Sottyń ákimshilik ister jónindegi sot alqasynyń tóraǵasy Aslan Túkıev, Áskerı sot tóraǵasy Ǵalymjan Násirdinov jáne Sot ákimshiliginiń halyqaralyq baılanystar bóliminiń meńgerýshisi D.Omarov bar qazaqstandyq delegatsııa qatysty.

Óz sózinde A.Merǵalıev berik quqyqtyq negizdi qalyptastyrý, joǵary sot organdarynyń tájirıbe men jetistiktermen almasý, sot tóreliginiń zamanaýı úrdisterin talqylaý jáne úzdik tásilderdi ázirleýde ózara is-qımyl jasaý úshin Uıym Jarǵysyn qabyldaýdyń mańyzdylyǵyn atap ótti. Qazaqstannyń sot júıesiniń ashyqtyǵyn, táýelsizdigin jáne adamdarǵa baǵdarlanýyn arttyrý úshin ony jańǵyrtý baǵyty týraly habardar etti.

Qazaqstandaǵy reformalar qatarynda sot júıesin qarjylandyrýdyń jańa modelin (barlyq memlekettik organdardyń shyǵystarynyń keminde 6,5%) engizýdi, aýdandyq sot tóraǵalaryn sýdıalar retinde saılaý rásimin, alqabılerdi tańdaýdyń tsıfrlyq rásimin, kassatsııalyq sotty, azamattyq jáne ákimshilik ister boıynsha sot isin júrgizýde aýmaqtan tys sottylyqty jáne t.b. atap ótildi. Sharalar sybaılas jemqorlyq táýekelderin tómendetýge, sottardyń beıtaraptyǵyna kúmándi joıýǵa jáne sot tóreligine degen senimdi arttyrýǵa baǵyttalǵan.

Іs-shara aıasynda A.Túkıev Túrkııanyń kassatsııalyq sotynyń tóraǵasy Ómer Kerkezben, Túrkııa Memlekettik keńesiniń tóraǵasy Zekı Iıgıtpen jáne Qyrǵyzstan Joǵarǵy soty tóraǵasynyń orynbasary Nýrgýl Bakırovamen kezdesýler ótkizdi.

QR Joǵarǵy Sotynyń tóraǵasy atap ótken postýlattarmen qatar, A.Túkıev Qazaqstanda zań ústemdigin, sot tóreliginiń qoljetimdiligin qamtamasyz etý boıynsha qabyldanyp jatqan sharalarǵa, ekonomıkalyq jáne ınvestıtsııalyq daýlardy qaraýdyń jańa tásilderine toqtaldy.

Onyń aıtýynsha, ÁRPK-te bekitilgen qaǵıdattardyń (protsesske qatysýshynyń quqyqtarynyń basymdyǵy, sottyń belsendi róli jáne t.b.) arqasynda azamattar men kásipkerler memlekettik organdarǵa qarsy isterdiń 58 paıyzyn utyp shyǵady. Ol Qazaqstan Respýblıkasynyń sot reformasynyń quramdas bóligi bolyp tabylatyn apellıatsııanyń rólin kúsheıtý, tsıfrlandyrý jáne robottandyrý, jasandy ıntellekt elementteri bar servıster jáne t.b. týraly aıtty.

Syndarly pikir almasý boldy.

Eske salaıyq, Senat Joǵarǵy sot sýdıasyn qyzmetinen bosatty.