Qazaqstan túrik ınvestorlaryna birlesken jobalardy iske asyrý úshin qoldaý quraldaryn usynýǵa daıyn – Bektenov
ASTANA. KAZINFORM – Qazaqstan túrik ınvestorlaryna birlesken jobalardy iske asyrý úshin memlekettik qoldaý quraldaryn usynýǵa daıyn. Bul týraly Úkimet úıinde Túrkııa Vıtse-prezıdenti Jevdet Iylmazben Saýda-ekonomıkalyq yntymaqtastyq jónindegi komıssııanyń 14-otyrysyn ótkizip jatqan Premer-mınıstr Oljas Bektenov aıtty.
- Saýda-ekonomıkalyq jáne ınvestıtsııalyq ózara árekettesýimiz jyldan-jylǵa nyǵaıyp keledi. Túrkııa Qazaqstannyń jetekshi saýda seriktesteriniń biri. Bizdiń aqparatqa sáıkes, 2025 jyldyń qorytyndysy boıynsha ekijaqty taýar aınalymy 9 paıyzǵa ósti. Eksport kólemi 17 paıyzdan astam ósip, 3,9 mlrd dollarǵa jetti. Biz túrik tarapymen birlesip, otandyq eksportty ártaraptandyrýǵa, ony shıkizattan qosylǵan quny joǵary ónimge aýystyrýǵa nıettimiz. Sonymen qatar Memleket basshylarymyz taýar aınalymyn ulǵaıtý mindetin qoıǵanyn atap ótken jón. Bizdiń bul maqsatqa jetý úshin barlyq múmkindikterimiz bar jáne qajetti kúsh-jigerdi salýǵa daıynbyz, - dedi Oljas Bektenov.
Úkimet basshysy eki eldiń ınvestıtsııalyq yntymaqtastyǵy ekijaqty qatynastardyń negizgi draıverleriniń biri ekenin atap ótti.
- 2005 jyldan beri elimizdiń ekonomıkasyna 6 mlrd dollardan astam túrik ınvestıtsııasy tartylsa, byltyrdyń ózinde bul kórsetkish 390 mln dollarǵa jýyqtady. Qazirgi ýaqytta Qazaqstanda túrik kapıtalynyń qatysýymen 5 myńnan astam kásiporyn tabysty jumys istep jatyr. Búginge deıin jalpy somasy 4 mlrd dollardy quraıtyn 98 ınvestıtsııalyq joba asyp, quny 3,9 mlrd dollar bolatyn 50 joba iske asyrylý ústinde. Qazaqstan birlesken jobalardy iske asyrý úshin ındýstrııalyq alańdar men memlekettik qoldaý quraldaryn usynýǵa daıyn, - dedi Premer-mınıstr.
Aıta keteıik, Túrkııa Prezıdenti Rejep Taııp Erdoǵan mamyr aıynda Qazaqstanǵa memlekettik saparmen keledi.
