Qazaqstan Túrki elderiniń kásipker áıelder komıtetine tóraǵalyq etedi

ASTANA. KAZINFORM – Qazaqstan Túrki elderiniń saýda-ónerkásip palatalary Odaǵy janyndaǵy kásipker áıelder komıtetine tóraǵalyq etedi. Sheshim Ystambulda ótken odaqtyń áıel kásipkerleriniń ekinshi Bas Assambleıasynyń otyrysynda aıtyldy. Bul týraly «Atameken» Іsker áıelder keńesiniń baspasóz qyzmeti málim etti.

Іs-sharaǵa túrki memleketteri uıymyna (TMU) kiretin Túrkııa, Qazaqstan, Qyrǵyzstan, Ázerbaıjan, Ózbekstan jáne Túrikmenstannan, sondaı-aq Vengrııadan 400-den astam isker áıel qatysty.

«Bizge qatysýshy elder arasyndaǵy ıntegratsııany nyǵaıtý kerek. Qazirgi tańda memlekettiń baılyǵyna aparatyn jol – ár túrli bızneske ıe bolý. Eń baı jáne eń qýatty elder buǵan dálel. Bul turǵyda biz áıelder kásipkerligin damytýǵa jáne memleketterimiz arasyndaǵy taýar aınalymyn keńeıtýge erekshe mán beremiz», - dep málimdedi Túrkııa palatalary men taýar bırjalary odaǵynyń prezıdenti Rıfat Hısardjıklyoglý.

Forýmda Qazaqstan delegatsııasyn «ASMAR» áıel kásipkerler ulttyq qaýymdastyǵynyń tóraǵasy, «Atameken» Іsker áıelder keńesiniń tóraǵasy Lazzat Ramazanova tanystyrdy. Ol túrki memleketteriniń isker áıelderiniń ózara qarym-qatynas dástúrleri tıimdi tájirıbe, ıdeıalar men resýrstarmen almasýǵa múmkindik beretinin, sondaı-aq kásibı jáne jeke tulǵalyq ósý úshin jaǵdaı jasaıtynyn atap ótti.

«Qazaqstan Ázerbaıjannan estafetany alyp, uıymǵa tóraǵalyq etýdi úlken jaýapkershilikpen qabyldap otyr. Elimizdiń tóraǵalyq qyzmetinde isker hanymdardyń qatysýymen óńirlik bıznes-jobalardy strategııalyq turǵydan damytý kózdelip otyr. Mundaı jobalardy qoldaý, olardy yntalandyrý jańa ári biregeı bıznes-ıdeıalardy qalyptastyrýǵa yqpal etip qana qoımaı, túrki memleketterinde jańa iskerlik ekojúıeni qurýǵa qajetti qolaıly ortany da qalyptastyratyn bolady», – dedi Lazzat Ramazanova.

Ol QR Prezıdenti Qasym-Jomart Toqaevtyń áıelder bıznesin damytýda sheshýshi ról atqaratynyn atap ótti. Elimizdegi 1 mln-nan astam shaǵyn jáne orta kompanııalar áıelderdiń basshylyǵymen jumys isteıdi. Sonymen qatar jahandyq syn-qaterler áıelderge jańa kedergiler men mindetter qoıady.

«Aımaqtyq qaqtyǵystar men klımattyq protsesterdiń ekonomıka men densaýlyq saqtaýǵa áseri birinshi kezekte áıelderge áser etedi. Sonymen qatar, «turaqty ekonomıka» qaǵıdattaryna kóshý protsesinde áıelderdi bir saty joǵary etedi. Biz ekologııalyq taza óndiriske, ekotýrızmge mamandanǵan kompanııalardy qura jáne damyta alamyz, jaýapty tutyný men óndiris tájirıbesin ilgerilete alamyz, aınalmaly ekonomıka qaǵıdattaryn engize alamyz jáne aımaqtarymyzdyń bıoártúrliligin saqtaýǵa yqpal ete alamyz», - dep sózin tolyqtyrdy Lazzat Ramazanova.

Bas Assambleıadan basqa Qazaqstan delegatsııasy «Bıznes-forýmǵa jáne B2B jelilik is-sharasyna» qatysty. Uıymdastyrýshylary Túrkııa palatalary men taýar bırjalary Odaǵy (TOBB) men túrik saýda-ónerkásip palatalary Odaǵy boldy.

Túrki elderiniń saýda-ónerkásip palatalarynyń odaǵy 2019 jyly quryldy jáne túrki memleketteri arasyndaǵy saýda-ekonomıkalyq yntymaqtastyqty odan ári damytý úshin tıimdi alań bolyp keledi. Qazirgi ýaqytta odaq quramyna Ázerbaıjan, Qazaqstan, Qyrǵyzstan, Túrkııa, Ózbekstan jáne Túrikmenstan kiredi.

2023 jyldyń qarasha aıynda Qazaqstan Túrki memleketteri uıymyna tóraǵalyq etýdi resmı túrde qabyldady. Ol 2024 jylǵy kezekti sammıtke deıin 12 aıǵa sozylady.