Qazaqstan túrki elderine dári-dármekti birlese satyp alýdy usyndy
ASTANA. KAZINFORM — Qazaqstannyń Densaýlyq saqtaý mınıstri Aqmaral Álnazarova Bishkekte ótken Túrki memleketteri uıymyna (TMU) múshe memleketterdiń densaýlyq saqtaý mınıstrleriniń 6-shy kezdesýinde dári-dármek satyp alý tetikterin biriktirýdi usyndy, dep habarlaıdy Kazinform agenttiginiń menshikti tilshisi.
Mınıstr TMU arasyndaǵy yntymaqtastyqtyń bolashaǵy zor baǵyttarynyń biri dári-dármekter men medıtsınalyq buıymdardy elaralyq satyp alý tetigin ázirleý ekenin atap ótti.
Bul dári-dármekterdiń qoljetimdi bolýyna jol ashady, halyqaralyq óndirýshilermen yntymaqtastyqty keńeıtedi jáne dári-dármekterdiń qaýipsizdigin nyǵaıtady.
Bastama aıasynda birneshe eldiń qajettilikterin biriktirýdi jáne satyp alý sharttary úılestiriledi. Bul elderge óndirýshilermen birlesip kelissózder júrgizýge jáne satyp alý tıimdiligin arttyrý úshin qosymsha múmkindikter jasaýǵa múmkindik beredi.
Osy maqsatta 2009 jyldan beri dári-dármekter men medıtsınalyq buıymdardy satyp alýdy ortalyqtandyryp kele jatqan Biryńǵaı dıstrıbıýtor «SK-Farmatsııa» JShS kompanııasynyń tájirıbesi men ınfraqurylymyn paıdalanýǵa bolady.
— 2026 jyldyń alǵashqy jartyjyldyǵynyń qorytyndysy boıynsha, 2,75 mıllıon patsıentke tegin dári-dármekter berildi. Medıtsınalyq uıymdar 258 mıllıard teńgege (shamamen 573,3 mıllıon AQSh dollary) ónim aldy. Satyp alý barysynda 68 mıllıard teńge (shamamen 151,1 mıllıon AQSh dollary) únemdeldi, — dep atap ótti mınıstr.
Vedomstvo basshysynyń aıtýynsha, qyrǵyz tarapynyń aldyn ala esebi boıynsha, bastapqy 17 dári-dármekti satyp alýdyń Qyrǵyz Respýblıkasy 628 myń AQSh dollaryn únemdeıdi (shyǵyndar shamamen 55%-ǵa tómendeıdi).
Sonymen qatar, Uıym ishindegi yntymaqtastyqty nyǵaıtý úshin Aqmaral Álnazarova DDSU benchmarkıngine sáıkes, 3-shi jetilý deńgeıine saı dári-dármekti TMU elderinde jedeldetilgen tirkeý rásimin engizýdi usyndy.
— 2026 jyly Qazaqstan TMD elderi arasynda dárilik zattardy retteý salasynda Jahandyq benchmarkıng quraly negizindegi DDSU-nyń 3-shi jetilý deńgeıine jetken alǵashqy el boldy. Túrkııada da DDSU-nyń 3-shi jetilý reıtıngi bar ekenin eskere otyryp, biz qazirgi ýaqytta elderimiz arasynda dárilik zattardy tirkeýdi jedeldetýdiń ekijaqty tetigin qurý múmkindigin qarastyrýdy usynamyz, — dedi Qazaqstan Respýblıkasynyń Densaýlyq saqtaý mınıstri.
Mınıstr sonymen qatar Qazaqstan ulttyq retteý júıeleriniń 3-shi jetilý deńgeıine jetý úshin praktıkalyq tájirıbe almasý maqsatynda TMU elderimen tyǵyz yntymaqtastyqta bolýǵa daıyn ekenin tilge tıek etti.
Eske sala keteıik, Qyrǵyzstan astanasyndaǵy «Ala-Archa» memlekettik rezıdentsııasynda Túrki memleketteri uıymyna múshe elderdiń densaýlyq saqtaý mınıstrleriniń 6-shy otyrysy ótip jatyr.
