Qazaqstan Túrki elderimen ekonomıkalyq yntymaqtastyqty nyǵaıtýdy kózdeıdi
ASTANA. KAZINFORM — Astanada Premer-mınıstrdiń orynbasary — mádenıet jáne aqparat mınıstri Aıda Balaeva 2026 jyly Qazaqstan Respýblıkasynyń Odaqqa tóraǵalyǵy aıasynda uıymdastyrylǵan Túrki saýda-ónerkásip palatalary odaǵynyń 3-shi Bas Assambleıasy qatysýshylarymen kezdesti. Bul týraly Úkimettiń baspasóz qyzmeti habarlady.
Jıynǵa Túrki elderiniń iskerlik sala ókilderi qatysty. Atap aıtqanda, R. Batalov («Atameken», Qazaqstan), M. Kárimsaqov (Syrtqy saýda palatasy, Qazaqstan), B. Ámreev (Túrki ınvestıtsııalyq qory), M. Bashqurt (Túrki álemi mýnıtsıpalıtetter odaǵy), A. Kýla (Túrki saýda-ónerkásip palatalary odaǵy), V. Zeınalov (Ázerbaıjan), M. Bakırov (Qyrǵyzstan), M. Gýrdov (Túrikmenstan), A. Shaıhov (Ózbekstan) jáne basqa da ókilder boldy.
Kezdesý barysynda Túrki memleketteri arasyndaǵy ekonomıkalyq yntymaqtastyqty damytý, saýda-ekonomıkalyq baılanystardy keńeıtý, sondaı-aq qatysýshy elderdiń iskerlik toptary arasyndaǵy ózara is-qımyldy nyǵaıtý máseleleri talqylandy.
Aıda Balaeva Túrki saýda-ónerkásip palatalary odaǵynyń jalpytúrkilik ekonomıkalyq múddelerdi ilgeriletý men birlesken bastamalardy júzege asyrýǵa arnalǵan mańyzdy ári tıimdi alań ekenin atap ótti. Sondaı-aq saýda-ónerkásip palatalarynyń bıznes-qoǵamdastyqtar arasynda tikeleı dıalog ornatýda jáne memleketaralyq kelisimderdi naqty ekonomıkalyq jobalarǵa aınaldyrýda sheshýshi ról atqaratyny sóz etildi.
Sondaı-aq odaqqa múshe elder arasyndaǵy ınvestıtsııalyq áriptestikti damytýǵa yqpal etetin Túrki ınvestıtsııalyq qorynyń jumysyn jandandyrý qajettigi talqylandy.
Túrkitildes elderdegi týrızm men týrıstik salany damytý, kólik-logıstıkalyq baǵyttardy keńeıtý, ónerkásiptik kooperatsııa, tsıfrlandyrý jáne ınnovatsııalyq sheshimderdi, onyń ishinde jasandy ıntellektini engizý máselelerine aıryqsha mán berildi.
Kezdesý qorytyndysy boıynsha taraptar Túrki memleketteri uıymy aıasynda ekonomıkalyq ıntegratsııany odan ári nyǵaıtýǵa jáne seriktes eldermen praktıkalyq yntymaqtastyqty damytýǵa daıyn ekendigin rastady.
Aıta ketelik Qazaqstan túrki elderiniń saýda-ónerkásip palatalary odaǵyna tóraǵa boldy.