Qazaqstan týrızmdi damytý ındeksinde tórt satyǵa tómendedi

ASTANA. KAZINFORM – Qazaqstan Dúnıejúzilik ekonomıkalyq forýmnyń Saıahat jáne týrızmdi damytý ındeksinde 110 eldiń arasynda 56-orynǵa ıe boldy. Bul týraly QR Sport jáne týrızm mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda málimdedi.

týrızm
Foto: Kazinform/JI

Mınıstrdiń aıtýynsha, reıtıng bıyl qyrkúıek aıynda jarııalanǵan. Zertteý týrızm salasynyń damý deńgeıin baǵalaıtyn bes negizgi baǵytty, 17 ındeksti jáne 102 kórsetkishti qamtıdy.

Qazaqstan aldyńǵy reıtıngpen salystyrǵanda tórt satyǵa tómendegen. Alaıda mınıstr bul kórsetkishke qaramastan, elimizdiń ındeks boıynsha jınaǵan baly zertteý júrgizilgen barlyq kezeńdegi eń joǵary nátıje ekenin atap ótti.

– Aldyńǵy reıtıngpen salystyrǵanda pozıtsııanyń tómendeýine qaramastan, ıaǵnı 52-orynnan 56-orynǵa aýysqanymyzben, elimiz zertteý júrgizilgen barlyq kezeńdegi eń joǵary ındekske – 7 múmkin baldyń 4,09 balyna qol jetkizdi, – dedi Erbol Myrzabosynov.

Onyń sózinshe, Qazaqstan reıtıngte Ázerbaıjan, Ózbekstan jáne Qyrǵyzstandy qosa alǵanda, birqatar memleketten alda tur.

Sonymen qatar mınıstr zertteý nátıjeleri týrızm salasynda áli de nazar aýdarýdy qajet etetin baǵyttardy aıqyndaǵanyn jetkizdi. Atap aıtqanda, ekologııalyq turaqtylyqty qamtamasyz etý, qurlyqtaǵy ınfraqurylymdy damytý, týrıstik suranystyń turaqtylyǵyn arttyrý jáne memlekettik saıasattaǵy týrızmniń basymdyǵyn kúsheıtý máseleleri ózekti bolyp otyr.

– Reıtıng nátıjeleri bizge áli de qandaı máseleler boıynsha jumys isteý qajettigin kórsetip otyr. Birinshi kezekte bul ekologııalyq turaqtylyq, qurlyqtaǵy ınfraqurylym, týrıstik suranystyń turaqtylyǵy jáne memlekettik saıasattaǵy týrızmniń basymdyǵyn arttyrý. Bul baǵyttar aldaǵy jumysta eskeriletin bolady, – dep tolyqtyrdy mınıstr.

Buǵan deıin Astanada týrızmdi damytý úshin ınfraqurylymdy keńeıtý qajet ekenin jazǵanbyz.