Qazaqstan týrızm jáne qonaqjaılyq salasynda Taıland tájirıbesin meńgerýge nıetti
ASTANA.KAZINFORM – Jyl saıyn 200 myńnan astam qazaqstandyq Taılandqa saıahattaıdy. Koroldik bıligi bul kórsetkishti gýmanıtarlyq baılanystardy nyǵaıtý arqyly ulǵaıtýdy kózdep otyr.
– Jyl saıyn Qazaqstannan 200 myńnan astam týrıst Taılandqa keledi. Árıne, biz bul kórsetkishti arttyrǵymyz keledi. Eki el arasyndaǵy baılanysty keńeıtip, áýe reısteriniń sanyn kóbeıtip, logıstıkalyq baǵyttardy yńǵaıly ári qoljetimdi etýge múddelimiz, – dedi Taıland Premer-mınıstriniń orynbasary – Syrtqy ister mınıstri Sıhasak Phýangketkeo jýrnalısterge.
Onyń aıtýynsha, týrıstik almasýdy damytýda eki el arasyndaǵy 30 kúnge deıingi vızasyz rejım mańyzdy ról atqarady.
– Biz Taılandta qazaqstandyq týrısterdiń kóp bolǵanyn qalaımyz. Týrızm salasyndaǵy yntymaqtastyqty kúsheıtý úshin barlyq qajetti sharalardy qabyldap jatyrmyz. Vızasyz rejım týrıstik maqsattarǵa arnalǵan ári elderimiz arasyndaǵy gýmanıtarlyq baılanystardy nyǵaıtýǵa yqpal etedi. Bolashaqta vızalyq talaptardy odan ári jeńildetý máselesi de qarastyrylýy múmkin dep senemin, – dedi Sıhasak Phýangketkeo.
Mınıstr Taılandtyń Qazaqstannan týrıst tartýmen ǵana shektelmeı, keri týrıstik aǵyndy damytýǵa da qyzyǵýshylyq tanytyp otyrǵanyn atap ótti.
– Biz Qazaqstandy zerttep jatyrmyz. Elde týrıster úshin tartymdy oryndar kóp, sondyqtan Qazaqstandy týrıstik magnıt retinde qarastyramyz. Taıland azamattarynyń Qazaqstanǵa degen qyzyǵýshylyǵyn arttyrǵymyz keledi. Meniń saparymnan keıin bul úderis jańa serpin alady dep senemin, – dedi ol.
Óz kezeginde Qazaqstannyń Syrtqy ister mınıstri Ermek Kósherbaev Taılandtyń týrızm salasynyń joǵary deńgeıde damyǵanyn atap ótip, qonaqjaılyq ındýstrııasyna maman daıarlaý baǵytyndaǵy tájirıbesin zerdeleýge qyzyǵýshylyq bildirdi.
– Taılandtaǵy qonaqjaılyq ındýstrııasy óte joǵary deńgeıde damyǵan. Ol jaqta osy salaǵa maman daıyndaıtyn arnaıy kolledjder men ınstıtýttar bar. Biz taılyq joǵary oqý oryndarynyń Qazaqstanda ókildikter ashý múmkindigin nemese qazaqstandyqtardyń Taılandta bilim alýyn keńeıtý máselesin talqyladyq. Bul baǵyttaǵy jumystar áli de pysyqtalady, alaıda taqyryp óte qyzyqty. Bizge jetispeıtin tustardy úırenip, úzdik elderdiń tájirıbesinen úlgi alý qajet, – dedi Ermek Kósherbaev.
Buǵan deıin Qazaqstan Taılandty ASEAN naryǵyna shyǵatyn mańyzdy qaqpa retinde qarastyratynyn jazǵanbyz.
