Qazaqstan týrızm salasynda qomaqty qarjydan aırylýda - «Arman týr» JShS dırektory
ALMATY. Aqpannyń 26-sy. QazAqparat /Erlik Erjanuly/ - Týrızm salasynyń el ekonomıkasyndaǵy orny áli aıqyndalǵan joq. Onyń múmkindigi tolyq paıdalanylmaı otyr.
Ony «Arman týr» JShS dırektory Gúlnara Áshimova-Bozshyǵulova QazAqparat tilshisine bergen suhbatynda aıtty.
Qazaqstanda ishki týrızmniń damýyna áli qolaıly jaǵdaı jasalǵan joq. Infraqurylymdy qalyptastyrý úrdisi baıaý júrip jatyr. Jergilikti ákimshilikter oǵan bıýdjette qarjy qarastyrylmaǵan degen jaýaptan esh tanbaýda. Ony jasaý úshin taraptar ózara kúsh biriktirýi kerek. Onsyz másele óz sheshimin taba qoıýy ekitalaı. Osynyń saldarynan el bıýdjeti qomaqty qarjydan qaǵylyp otyr.
«Týrıstik kompanııalar qazir túgeldeı derlik syrtqy týrızmmen aınalysýda. Óıtkeni ishki týrızmmen aınalysý olarǵa tıimsiz. Máselen, Almatyda 800 týrıstik fırmanyń qalaı jumys jasap jatqanyna, shynymdy aıtsam, ózim de tańdanamyn. Sebebi, qazir shet elde demalý kez-kelgen adamǵa qoljetimdi bola bastady. Máselen, Varshavada 2-aq týrıstik fırma bar. Onda demalǵan kezde men ózimniń, ne basqa da týrıstik kompanııalardyń qyzmetin paıdalanǵan joqpyn. Ǵalamtor arqyly aldyn-ala meımanhanadan oryn alyp, osy arqyly vızany da elshilikten jyldam jasattym. Qyzmet sapasy óte joǵary deńgeıde, al osyǵan qaramastan, onyń aqysy salystyrmaly túrde óte tómen», deıdi «Arman týr» JShS dırektory Gúlnara Áshimova-Bozshyǵulova. Onyń aıtýynsha, jergilikti týrızmmen aınalysý úshin kompanııalar E, D lıtsenzııasyn alý kerek. Qazaqstandyq kompanııalarda saıahatshylardyń avtobýstary da, jol kórsetýshi gıdteri de jaman emes. Alaıda olar týrısterdi Sharyn shatqaly sııaqty tabıǵat aıasyna aparǵan kezde tamaqtaryńyzdy ózderińizben birge ala júrińizder deýge májbúr. Óıtkeni onda kafe turmaq, basqa qajetti oryndar da joq. Mundaı jaǵdaıda syrttan sheteldik saıahatshylardy tartý aqylǵa syıymsyz is sııaqty kórinedi.
«Máselen, byltyr bizdiń kompanııa arqyly shetelden taza týrıstik saparmen 3-4 adam ǵana keldi. Ózgeleri kelissóz jasaýǵa, ne qandaı da bir is-sharalarǵa qatysý úshin kelgen kásipkerler, ǵalymdar jáne taǵy basqalar boldy. Eger quzyrly organdar týrıstik fırmalardyń qyzmetin jan-jaqty tekseretin bolsa olardyń sany aıtarlyqtaı qysqarýy múmkin. San - sapaǵa ákeledi degen túsinik bul jerde sáıkestik taýyp otyrǵan joq», deıdi «Arman týr» kompanııasynyń basshysy .
