Qazaqstan týrıstik baǵyttardy qalaı damytyp jatyr
ASTANA.KAZINFORM – Astana men Almatynyń týrıstik múmkindikterin bir baǵytta damytý máselesi týraly AIMAQ podkastynyń jańa shyǵarylymynda sarapshylar aıtyp berdi.
Astana Tourism týrızmdi damytý ortalyǵynyń týrıstik baǵyttar men qyzmetterdi damytý departamentiniń dırektory Olga Abeldınovanyń aıtýynsha, Almaty týrısterdi tabıǵı kórikti jerlerimen, asqar taýlarymen jáne ózindik mádenıetimen qyzyqtyrsa, Astana zamanaýı sáýletimen, iskerlik kezdesýlerimen jáne túrli mádenı-kópshilik is-sharalarymen erekshelenedi.
– Búginde Almaty men Astana bir-birin jaqsy tolyqtyrady. Biz áýe kompanııalarymen birlesip, eki qalany qamtıtyn týrıstik usynystar men sapardy qoljetimdi etý joldaryn qarastyryp jatyrmyz. Sheteldik týrıst úshin aldymen elordaǵa kelip, odan keıin Almatyǵa ushyp barǵan óte tıimdi, – dedi ol.
Іshki týrızmmen aınalysatyn Skyway týroperatorynyń jetekshisi Ásem Qozbaǵarova da týrısterdiń eki qalany bir sapar aıasynda aralaýdy qolǵa alǵanyn rastady.
Onyń aıtýynsha, saıahatshylar Almatyǵa ushyp kelip, odan ári Ortalyq Azııa nemese Kavkaz elderine jol tarta alady. Keıin Qazaqstanǵa Astana arqyly qaıta oralýyna da múmkindik bar.
Jańa áýejaı jáne halyqaralyq reıtıng
Sarapshy týrızmdi damytýda áýe qatynasynyń mańyzy zor ekenin de atap ótti. Onyń pikirinshe, jańa áýejaıdyń salynýy, áýe kompanııalarynyń qatary men reıster sanynyń artýy Qazaqstanǵa keletin sheteldik týrıster sanyn kóbeıtýge múmkindik beredi.
Sondaı-aq Astananyń halyqaralyq Lonely Planet saıahatshylarǵa arnalǵan basylymynyń usynystar tizimine enýine qatysty Ásem Qozbaǵarova mundaı jarııalanymdar qalanyń tanymaldylyǵyn arttyratynyn, alaıda onyń nátıjesi birden baıqalmaıtynyn aıtty.
– Bul qala úshin qosymsha jarnama. Sonyń arqasynda álemniń basqa elderindegi adamdar Qazaqstan men onyń astanasy týraly bile bastaıdy. Biraq maqala búgin jarııalandy eken dep, erteń týrıster aǵylyp keledi deýge bolmaıdy. Mundaı qyzyǵýshylyqtyń qalyptasýyna jyldar qajet bolýy múmkin. Adamdar birtindep qala týraly aqparat jınap, oǵan degen qyzyǵýshylyǵy artady. Sóıtip, bir-eki jyldan keıin saıahatyn josparlaýy múmkin, – dep túsindirdi ol.
Aıta keteıik, euronews Almatydaǵy týrızm týraly úsh tilde maqala jarııalaǵan edi.
