Qazaqstan týrıstik salanyń úlesin JІÓ-niń 8 paıyzyna deıin jetkizbek – Prezıdent
Qasym-Jomart Toqaev týrızm salasynyń áleýetin arttyrý máselesine de toqtaldy. Bul sala pandemııaǵa qaramastan, yntymaqtastyqtyń perspektıvti baǵyttarynyń biri bolyp qala beredi.
– Qazaqstan týrıstik salanyń úlesin 2025 jylǵa qaraı ishki jalpy ónimniń 8 paıyzyna deıin jetkizýdi kózdep otyr. Biz Ortalyq Azııa elderi men kúlli túrki álemi úshin qasıetti sanalatyn Túrkistan qalasyn belsendi damytyp jatyrmyz. Tek 2020 jyldyń ózinde qalanyń ınfraqurylymyna, Túrkistannyń týrızmi men logıstıkasyna quıylǵan ishki ınvestıtsııa shamamen 1 mıllıard dollardy qurady. Túrkistan Qazaqstannyń TOP-10 týrıstik baǵytyna kirdi. Bul sizderdiń elderińizdiń ınvestorlary men týrısteri úshin tartymdy óńir bolmaq, – dedi Prezıdent.
Memleket basshysy densaýlyq saqtaý salasy da Qazaqstanǵa keletin sheteldik ınvestıtsııaǵa «tartylys ortalyǵy» bola alatynyn atap ótti. Básekege qabiletti tarıfter, joǵary bilikti jumys kúshi jáne memlekettik-jeke menshik áriptestiktiń basqa da kóptegen múmkindikteri arqyly elge túrik kompanııalary tartyldy. Olar Qazaqstanda jańa aýrýhanalardyń qurylysyna jáne olardy joǵary tehnologııaly medıtsınalyq quraldarmen jabdyqtaýǵa atsalysýda.
– Túrkııanyń Rönesans Holding kompanııasy Qazaqstannyń jeti qalasynda óz emhanalarynyń qurylysyn bastamaqshy. Sondaı-aq biz Qazaq ulttyq onkologııa jáne radıologııa ınstıtýtymen birlese otyryp, bıyl Almaty qalasynda Tomoterapııa ortalyǵyn iske qosýdy josparlap otyrǵan Orhun Medical kompanııasynyń jumysyna sáttilik tileımiz. Túrik kompanııalarymen yntymaqtastyq jalǵasa beretinine senimdimin. Sonymen qatar biz Qazaqstannyń densaýlyq saqtaý salasyna ınvestıtsııa quıý úshin basqa da qatysýshy-memleketterdegi seriktesterimizdi shaqyrýǵa nıettimiz, – dedi Qasym-Jomart Toqaev.
Eske sala ketsek, Qazaqstan Prezıdenti Ekonomıkalyq yntymaqtastyq uıymynyń 14-sammıtine qatysty.
