Qazaqstan týrısteri Túrkııa ekonomıkasyna qansha qarjy saldy
PETROPAVL. QazAqparat - Búgin Qazaqstan men Reseıdiń Óńiraralyq yntymaqtastyǵynyń XV forýmynda QR Mádenıet jáne sport mınıstri Arystanbek Muhamedıuly eki eldiń týrızm salasyn damytýdyń múmkindikterin baıandady, dep habarlaıdy QazAqparat.
«Eýrazııanyń ortalyǵynda ornalasqandyqtan, bizde strategııalyq basymdyq bar. Bizdiń elder arqyly qurlyqtyń kóliktik, tranzıttik, saýda jelileri ótedi. Ushaqpen 4-5 saǵattyq áýe sapary aýmaǵynda Taıaý Shyǵystyń iri elderi, Qytaı, Iran, Úndistan ornalasqan. Búginde bul memleketter barsha álemde týrıstik aǵynnyń negizgi bóligin qurady. Jyl saıyn tek Úndistannan 22 mln, al Qytaıdan 130 mln týrıst saparlaıdy», - dedi mınıstr.
Osy oraıda ol Qazaqstan men Reseı arasyndaǵy týrızm jaǵdaıyna toqtaldy.
«Halyqaralyq týrısterdi belsendi túrde tarta otyryp, ózara týrıstik saparlarmen almasý baǵytyn arttyrýǵa ekpin qoıý mańyzdy. Reseıge Qazaqstannyń, al reseılik týrısterdiń bizdiń elimizge qaraı aǵyny sáıkesinshe 3 jáne 4 mıllıondy quraıdy. Sonymen qatar, alys shetelge shyǵatyn týrızmniń kórsetkishteri de joǵary bolyp tur. Bul óz kezeginde qarjylyq jaǵynan qomaqty soma syrtqa ketedi. Máselen, tek bıyldyń ózinde qazaqstandyq týrıster Túrkııanyń ekonomıkasyna 1 mlrd AQSh dollarynan astam qarjy saldy», - dedi A. Muhamedıuly.
Vedomstvo basshysynyń paıymynsha, atalǵan úrdisti tómendetken utymdy bolady. Osy oraıda kórshiles eki elge ózara tıimdi qarym-qatynastardy pysyqtap, halyqaralyq týrısterdi tartýǵa aıryqsha nazar aýdarǵan jón. Bul turǵyda ekologııalyq, emdik-saýyqtyrý, medıtsınalyq, sporttyq, mádenı, iskerlik týrızmge suranys aıtarlyqtaı artady.
«Búginde barsha álem salaýatty ómir saltyna ári densaýlyq profılaktıkasy baǵytyna ekpin qoıyp otyr. Osydan ekologııalyq taza óńirlerdegi shıpaıjaılyq-kýrorttyq emdeý oryndaryna suranys eleýli túrde artyp otyr. Mundaı biregeı oryndar Qazaqstan men Reseıde az emes ekenin eskersek, eki eldiń aýmaǵyndaǵy atalǵan salalardaǵy qyzmetterdiń tolyq kólemin usynýǵa múmkindikter bar», - dedi Arystanbek Muhamedıuly.
Taratylǵan málimetterge qaraǵanda, Qazaqstanda 144 shıpajaı-kýrorttyq uıymdar bar, onyń 48-i kýrorttyq aımaqtarda ornalasqan.
Mınstrdiń aıtýynsha, shekaralas óńirlerde ekologııalyq, tanymdyq ári sporttyq týrızmge aıryqsha mán beriledi.
Bul turǵyda «Altaı jaýharlary», «Álem bıigi» jáne basqa da sımvoldyq ataýlarmen biregeı tabıǵı qoryqtarǵa saparlaý úshin transshekaralyq týrlardy iske qosý usynyldy.
Budan buryn habarlanǵandaı, Petropavlda QR Prezıdenti Nursultan Nazarbaev pen RF Prezıdenti Vladımır Pýtınniń qatysýymen Qazaqstan men Reseıdiń Óńiraralyq yntymaqtastyǵynyń XV forýmy bastaldy.
