Qazaqstan túrikteri qaýymdastyǵy byltyr týrızm salasyna 125 mln. dollar ınvestıtsııa tartty

ASTANA. QazAqparat - Qazaqstandyq túrikter byltyr elimizdiń týrızm salasyna 125 mln. AQSh dollary kóleminde ınvestıtsııa tartty. Bul týraly búgin Ortalyq kommýnıkatsııalar qyzmetinde ótken baspasóz máslıhatynda Qazaqstan halqy Assambleıasy keńesiniń múshesi, «Ahyska» Qazaqstan túrikteri qaýymdastyǵynyń tóraǵasy Zııatdın Kasanov málim etti.

«Qazaqstandyq qoǵamnyń múshesi retinde biz Qazaqstannyń áleýmettik jáne ekonomıkalyq jaǵdaıyna óz úlesimizdi qosyp kelemiz», - deıdi Z. Kasanov.

- Biz Túrkııa úkimetimen baılanys ornata otyryp, Talǵar qalasynda az qamtylǵan otbasy balalaryna arnap, Qazaq-Túrik lıtseıin saldyq. Joba quny shamamen 10 mıllıon AQSh dollaryn qurady. Onda 500 bala bilim ala alady, 350 balaǵa jataqhana da qarastyrylǵan. Ol jerde kúnine 5 ret tamaqtandyrý uıymdastyrylǵan. Oqý baǵdarlamasy memlekettik, aǵylshyn jáne túrik tilinde júredi. Sondaı-aq, Qazaqstanda 18 sport zal men kóptegen meshit saldyq».

Etnomádenı birlestiktiń tóraǵasy atap ótkendeı, Qazaqstan túrikteri árdaıym úkimet jarııalanǵan barlyq áleýmettik jobalarǵa qatysýǵa tyrysady.

«Tek 2014 jyldyń ózinde týrızm salasyna 125 mıllıon dollar ınvestıtsııa tarttyq. Sonymen qatar, sý shaıyp ketken Qyzylaǵashty qalpyna keltirýge belsendi qatystyq. Qazir onda birlestik kómegimen monsha men sportzal paıdalanýǵa berildi. Batys Qazaqstanda, Ońtústik qazaqstan oblystarynda bolǵan sý tasqyndarynyń saldarlaryn joıýǵa kúshimizdi saldyq. Bıyl da Qaraǵandy oblysynda tasqyn sýlardan zardap shekken halyqqa 140 tonna alǵashqy kómek taýarlaryn jiberdik», - dep atap ótti Z. Kasanov.

Aıta keteıik, bıylǵy jyl Qazaqstan halqy Assambleıasy jyly dep jarııalanǵan bolatyn. Sonyń aıasynda etnomádenı birlestikter iri áleýmettik jáne mádenı is-sharalardy qolǵa alýda. Sonymen qatar QHA-nyń «Beıbitshilik pen kelisim jol kartasyn» jasaýda óz úlesin qosýda.