Qazaqstan turǵyndarynyń 50 paıyzǵa jýyǵy ınternetpen qamtamasyz etilgen - A.Jumaǵalıev
TANA. 23 qarasha. QazAqparat /Marlan Jıembaı/ - Qazaqstan turǵyndarynyń 50 paıyzǵa jýyǵy ınternetpen qamtamasyz etilgen.
Bul týraly búgin elordanyń ınnovatsııalyq damýyna arnalǵan «Smart Astana-2011» konferentsııasy barysynda QR Baılanys jáne aqparat mınıstri Asqar Jumaǵalıev málim etti.
Qazirgi tańdaǵy elimizdegi telekommýnıkatsııa salasynyń damý jaǵdaıyna jeke-jeke toqtalyp ótken mınıstr: «Telekommýnıkatsııalyq jeliler turǵysynan alyp qaraǵanda, árıne, sala qarapaıym sandardan, atap aıtqanda abonentter, ınternet paıdalanýshylar sanynan-aq kórinis tabady. Jáne de osy salada Qazaqstan aıtarlyqtaı jaqsy qarqynmen damýda», - dedi.
Onyń atap ótýinshe, uıaly jeli abonetteriniń sany 137 paıyzdan asyp túsken. Bul qazirgi tańda Qazaqstan turǵyndarynyń árqaısysynda 1 telefonnan, keı jaǵdaılarda 2-3 telefonnan bar degendi bildiredi.
«Internet paıdalanýshylar turǵysynan alyp qarasaq, bul tsıfr 41 paıyzdyq mejeni eńserdi. Sonymen qatar naqty Astana qalasy týraly aıtar bolsaq, onda bul jerdegi ınternet paıdalanýshylardyń sany 47 paıyzdan asyp jyǵylady», - dedi A.Jumaǵalıev.
Mınıstrdiń aıtýynsha, qazirgi tańda elimizdegi sandyq júıege kóshý shegi 90 paıyzdan assa, al elordada 100 paıyzǵa jetken. «Árıne, meniń Qazaqstanda ADSL syndy tehnologııany qamtıtyn eń jańa tehnologııalar, ınternet, uıaly baılanys qarqyndy damyp kele jatqandyǵyn atap ótkim keledi», - dedi ol.
