Qazaqstan turǵyndarynyń 11%-yna tumaýǵa qarsy vaktsına egildi
«Dúnıejúzilik densaýlyq saqtaý uıymynyń usynysy boıynsha, halyqtyń 10%-yna tumaýǵa qarsy vaktsına egý kerek bolsa, Qazaqstanda turǵyndardyń 11%-y egildi. Vaktsına alty aıdan asqan nárestelerge, dárigerlerge, júrek qan-tamyr sozylmaly aýrýlary bar, tynys joldary sozylmaly aýrýlary bar naýqastarǵa, Balalar úılerindegi balalar men Qarttar úıindegi qarııalarǵa jáne júktiliktiń ekinshi, úshinshi kezeńindegi áıelderge egildi. Bıyl 2 125 000 turǵynǵa vaktsına egildi. Tumaý jáne tumaýǵa uqsas jiti respıratorly vırýstyq ınfektsııalar jaǵdaıy turaqty. Byltyrmen salystyrǵanda 20% tómen», - deıdi QR DSM Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary Jandarbek Bekshın.
Ol tumaý jáne JRVI-ǵa shaldyqqandarǵa keńes aıtty.
«Adam kóp júretin qoǵamdyq oryndar men jabyq nysandarda júrý - qaýipti. Immýnıtetti kóterý úshin dárýmender iship, jemis-jıdek jıi jeý kerek. Sondaı-aq, ımbır men lımon qosylǵan sý ishý paıdaly», - deıdi ol.