Qazaqstan turǵyndardy tegin skrınıngten ótkizetin TMD-daǵy jalǵyz el
ALMATY. QazAqparat - 2019 jyly mılıondaǵan qazaqstandyq áıelderdi jatyr moıyny qaterli isigine tekseredi. Bul týraly Almatydaǵy baspasóz máslıhatynda QR Densaýlyq saqtaý mınıstrliginiń bas onkology Dılıara Qaıdarova aıtty, dep habarlaıdy QazAqparat.
«Jatyr moıyny qaterli isigi - gınekologqa baryp, turaqty túrde tekserilip tursa, onkologııany aldyn alýǵa bolatyn jalǵyz túri. 30-70 jas aralyǵyndaǵy barlyq áıelder óz emhanalarynda jatyr moıyny qaterli isigine tegin skrınıngten óte alady. Tekserý nátıjesi jaqsy shyqsa, áıelder 4 jyldan keıin qaıta skrınıngen óte alady. Oıdaǵydaı shyqpasa, ary qaraı onkogınekologqa jáne basqa da mamandarǵa em alýǵa jiberiledi. Qazaqstan - turǵyndar úshin tegin skrınıngter jasalatyn TMD-daǵy jalǵyz el», - dedi Dılıara Qaıdarova.
Aıta keteıik, Dúnıejúzilik densaýlyq saqtaý uıymy 2019 jyldy - Jatyr moıyny qaterli isigine qarsy kúres jyly dep jarııalady.
«Biz ınstıtýtymyzda zertteý jumysyn júrgizdik. Bizdiń mamandarymyz anyqtaǵandaı, jatyr moıyny qaterli isigi 16 jáne 18 tıptegi papılloma vırýsy saldarynan paıda bolady. Sondyqtan, eki valentti ekpe saldyryp alý qajet. AQSh pen Kanadada vaktsınatsııa 10 jyldan beri júrgizilip keledi», - dedi Dılıara Qaıdarova.
Qazaqstanda jatyr moıyny qaterli isigi jaǵdaıy jylyna 1700 ret tirkelse, sonyń ishinde 600 áıel ómirden ozǵan. Bul aýrýǵa kóbine 40-44 jas aralyǵyndaǵy áıelder shaldyǵady.
