Qazaqstan turǵyn úımen qamtamasyz etý boıynsha TMD elderi ishinde 1-orynda tur
«2019 jyly turǵyn úı qurylysyna salynǵan ınvestıtsııa kólemi 17 paıyzǵa artyp, 1,4 trln teńgeni qurady. Investıtsııalardyń aıtarlyqtaı kólemi «Nurly jer» baǵdarlamasy boıynsha rekordtyq 13,1 mln sharshy metr turǵyn úıdi tapsyrýǵa jáne respýblıkanyń turǵyn úı qoryn 116 myń baspanaǵa jańartýǵa múmkindik berdi», - dedi Marhabat Jaıymbetov OKQ-da ótken baspasóz máslıhatynda.
Komıtet tóraǵasynyń aıtýynsha Qazaqstan turǵyn úıdi qoldanysqa berý jaǵynan TMD elderi ishinde eń joǵary (Qazaqstan – 0,71 sh.m, Reseı - 0,54 sh.m., Belarýs - 0,40 sh. m., Ózbekstan - 0,36 sh. m.) kórsetkishterdiń birine ıe bolyp otyr.
«Nurly jer» baǵdarlamasy iske asyrylǵan úsh jylda 50 myńnan astam otbasy (2,9 mln sharshy metr) áleýmettik turǵyn úımen qamtamasyz etildi. 16 myń azamat «7-20-25» ıpotekalyq baǵdarlamasyna qatysty. Azamattarǵa jeke turǵyn úı salýǵa bólinetin 130 myń jer ýchaskesi ınjenerlik kommýnıkatsııalarmen qamtyldy. «Baqytty otbasy» baǵdarlamasy ótken jyldyń maýsym aıynda bastalyp, 5 myń múgedek balasy bar, kópbalaly jáne tolyq emes otbasylaryna turǵyn úı jaǵdaıyn jaqsartýǵa múmkindik berdi. 2020-2023 jyldary 40 myń otbasyna qoldaý kórsetý josparlanyp otyr. Bul jyl saıyn 10 myń otbasyny quraıtyn bolady», - deıdi ol.
Marhabat Jaıymbetov óz sózinde halyqtyń áleýmettik osal toptarynyń, atap aıtqanda jetim balalardyń, múgedekter men basqa sanattaǵy azamattardyń turǵyn úı máselesi erekshe baqylaýda turǵanyn atap ótti.
«Memleket basshysynyń tapsyrmasy boıynsha úsh jyl ishinde ásirese az qamtylǵan kópbalaly otbasylardy baspanamen qamtamasyz etýdi josparlap otyrmyz. Bul úshin turǵyn úı zańdaryna zańnamalyq túzetýler engizildi. Osylaısha «Nurly jer» baǵdarlamasy boıynsha qarjylandyrý tetikteri kózdeldi. Osy sanattaǵy 40 myńnan astam kezekte turǵandardyń ishinde 2019 jyly túrli tetikter boıynsha 7 387 otbasy turǵyn úımen qamtamasyz etildi», - dedi komıtet basshysy.
