Qazaqstan turǵyn úı qurylysy boıynsha TMD elderi arasynda 1-orynda

NUR-SULTAN. QazAqparat - 2020 jyldyń qorytyndysy boıynsha Qazaqstan TMD elderi arasynda turǵyn úı qurylysy salasynda 1-shi orynda, dep habarlaıdy QazAqparat QR IIDM baspasóz qyzmetine silteme jasap.

Vedmostvonyń málimetinshe, yltyr Qazaqstanda turǵyn úıdi paıdalanýǵa berý kórsetkishi jan basyna shaqqanda 0,81 sharshy metrge jetti. «Bul TMD elderi arasyndaǵy eń joǵary kórsetkish jáne ol ekonomıkalyq damyǵan elderdiń deńgeıine jaqyndady. Máselen, ótken jyldyń qorytyndysy boıynsha Reseıde - 0,56 sharshy metr, Belarýs elinde - 0,45 sharshy metr, al Ózbekstanda - bir adamǵa 0,36 sharshy metr turǵyn úı paıdalanýǵa berilgen», delingen habaralmada.

Bul kórsetkish 2019 jyldan bastap ólshenip keledi jáne Qazaqstan ekinshi jyl qatarynan TMD elderi arasynda kóshbasshy boldy.

«Nurly jer» memlekettik turǵyn úı-kommýnaldyq damý baǵdarlamasynyń sheńberinde halyqqa qolaıly turmys jaǵdaıyn jasaý, turǵyn úı qoljetimdiligi men jaılylyǵyn arttyrý, sondaı-aq turǵyn úı ınfraqurylymyn damytý - memlekettik saıasattyń basym baǵyttary», - Indýstrııa jáne ınfraqurylymdyq damý mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov.

Esterińizge sala keteıik, 2020 jyly baǵdarlamanyń barlyq qarjylandyrý kózderinen biryńǵaı turǵyn úı saıasatyn iske asyrý jónindegi tapsyrma aıasynda rekord 15,3 mıllıon sharshy metr turǵyn úı paıdalanýǵa berildi, bul 2019 jylǵy kórsetkishten 16,8% artyq.