Qazaqstan turǵyn úı baǵasy eń tómen 10 eldiń qatarynda

NUR-SULTAN. QazAqparat – Elimizde jáne álemde baǵanyń edáýir ósýine qaramastan, Qazaqstandaǵy turǵyn úı áli de aıtarlyqtaı arzan bolyp otyr. Numbeo málimetteri boıynsha, qala ortalyǵyndaǵy turǵyn úı quny boıynsha elder reıtıngisinde Qazaqstan baǵasy eń tómen 10 eldiń qataryna kirdi, dep habarlaıdy QazAqparat Finprom.kz saıtyna silteme jasap.

Elimizde qala ortalyǵyndaǵy turǵyn úıdiń sharshy metri ortasha eseppen 927,2 AQSh dollary bolady. Bul – reıtıngidegi 106 eldiń ishinde 10-oryn. QR-dan basqa TMD-nyń birde-bir eli baǵasy tómen 10 eldiń qataryna kirmegen. Sektor boıynsha úzdik úshtikke Pákistan (bir sharshy metri 585 AQSh dollary), Egıpet (618,2 AQSh dollary) jáne Venesýela (672,1 AQSh dollary) kirdi.

TMD-nyń ózge elderi arasynda Qazaqstannan basqa Moldovada (sharshy metri 1047,9 AQSh dollary) jáne Ózbekstanda (1083,4 AQSh dollary) baǵa neǵurlym arzandaý. Eki elde de halyqtyń tabysy QR-ǵa qaraǵanda aıtarlyqtaı tómen. Qazaqstanǵa qaraǵanda Ýkraınada (sharshy metri 1181,9 AQSh dollary), Ázerbaıjanda (1306,6 AQSh dollary), Belarýste (1629,1 AQSh AQSh dollary), Armenııada (2228,1 AQSh dollary) jáne Reseıde (sharshy metri 3258,2 AQSh dollary jáne 106-dan birden 76-orynda) turǵyn úı qymbat.

Sharshy metri eń qymbat jáne turǵyn úıdiń baǵasy eń joǵary elder – Gonkong, Sıngapýr jáne Ońtústik Koreıa.