Qazaqstan turǵyn úı kompanııasy bıyl qurylys salasyna 900 mlrd teńgeden astam qoldaý kórsetedi

ASTANA.KAZINFORM – «Qazaqstan turǵyn úı kompanııasy» AQ bıyl turǵyn úı qurylysy salasyna 900 mlrd teńgeden astam qarjylaı qoldaý kórsetýdi josparlap otyr. Bul týraly kompanııanyń Basqarma tóraǵasy Altaı Kúzdibaev qurylys kompanııalary men seriktesterine arnalǵan kezdesýde aıtty.

v
Foto: Tastan Toıanov/Kazinform

Onyń sózinshe, búgingi sharaǵa elimizdiń barlyq óńirinen seriktester men iri qurylys kompanııalarynyń ókilderi shaqyrylǵan. Kezdesýdiń basty maqsaty – jańa qoldaý tetikteri men tsıfrlyq servısterdi tanystyrý, sondaı-aq jańadan engizilgen reıtıngtik modeldiń jumys tártibin túsindirý.

– Bıyl biz turǵyn úı qurylysy salasyna 900 mlrd teńgeden astam qoldaý kórsetemiz. Qazirgi ýaqytta osy mejege jaqyndap qaldyq. Ótken jylmen salystyrǵanda bul kórsetkish 30 paıyzdan astam ósedi. Byltyr turǵyn úı qurylysy salasyna 707 mlrd teńge kóleminde qarjylaı qoldaý kórsettik, – dedi Altaı Kúzdibaev.

Onyń aıtýynsha, kelesi jyldy Memleket basshysynyń Joldaýyna sáıkes qurylys salasy úshin aýqymdy kezeń dep qarastyryp otyr. Osyǵan baılanysty kompanııada jańa qoldaý tetikteri ázirlengen. Aldaǵy josparlar qurylys kompanııalarynyń ókilderimen talqylanyp jatyr.

Jýrnalıster Halyqtyq qurylys jylyna baılanysty qarjylandyrý kólemi ulǵaıa ma dep surady.

Altaı Kúzdibaev ázirge naqty ósim paıyzy belgilenbegenin aıtty. Degenmen kommýnaldyq jáne energetıka sektoryn jańǵyrtýǵa baǵyttalǵan ulttyq joba aıasynda kelesi jyly 300-400 mlrd teńgeden astam qarajat qarastyrylýy múmkin ekenin jetkizdi.

– Ótken jyly biz turǵyn úı-kommýnaldyq sharýashylyǵy men energetıka salasyn jańǵyrtýǵa baǵyttalǵan ulttyq jobany bastadyq. Bıyl osy maqsatqa ákimdikterge 200 mlrd teńge bóldik. Kelesi jyly jekemenshik nysandar men jobalar da bolady. Ákimdikter óz jumystaryn jalǵastyrady. Jalpy, osy baǵyttaǵy qarjy kólemi 300-400 mlrd teńgeden asady dep esepteımiz. Qazir naqty qandaı jobalar bolatynyn qarastyryp jatyrmyz, – dedi ol.

Kompanııa basshysy 900 mlrd teńgeden astam qoldaýdyń qandaı kózder men tetikter arqyly qalyptasatynyn da túsindirdi. Onyń aıtýynsha, bul somaǵa úleskerlerdiń qarajatyn tartýǵa beriletin kepildikter de kiredi.

– Biz ártúrli tetikter boıynsha qoldaý kórsetemiz. Mysaly, úleskerlerdiń qarajatyn tartý úshin kepildik beremiz. Munyń ózi de qarjylaı qoldaý tetigi. Barlyq tetikti birge eseptegende, qoldaý kólemi 900 mlrd teńgeden asyp otyr, – dedi Altaı Kúzdibaev.

Onyń aıtýynsha, qurylys kompanııalary turǵyn úıdi óz qarajatyna salady, sonymen qatar azamattar men úleskerlerden de qarajat tartady. Al kompanııa tarapynan kórsetiletin qoldaýdyń negizgi bóligi ákimdikterdi qarjylandyrýǵa baǵyttalǵan.

– Biz ákimdikterge kredıttik turǵyn úı jáne jalǵa beriletin turǵyn úı qurylysyna, sondaı-aq naqty maqsattaǵy jobalarǵa qarjy bólemiz, – dedi ol.

Sonymen qatar Altaı Kúzdibaev kompanııanyń bul baǵyttaǵy jumysy kommýnaldyq jáne energetıka sektoryn jańǵyrtý jónindegi ulttyq joba aıasynda júrgiziletinin aıtty. 

Buǵan deıin Qazaqstanda qurylys qarqyny artqanyn jazǵan edik.