«Qazaqstan týraly úzdik roman» baıqaýyna ótinim qabyldaý aıaqtaldy

ASTANA. QazAqparat – Búgin «Qazaqstan týraly úzdik roman» ádebı baıqaýyna ótinim qabyldaý aıaqtaldy. Bıyl «Metsenat» ádebı syılyǵyna 58 roman úmitker retinde tirkeldi, dep habarlaıdy QazAqparat tilshisi.

Bul týraly baıqaýdy uıymdastyrýshylar habarlady.

«Búgin «Qazaqstan týraly úzdik roman» ádebı baıqaýǵa qatysýshylardyń shyǵarmalaryn qabyldaý aıaqtaldy. «Metsenat.kz» ádebı syılyǵynyń ekinshi maýsymyna shyǵarmalardy qabyldaý qyrkúıekte bastalǵan bolatyn. Bıyl baıqaýǵa sheteldegi qandastarymyzdyń da qatysýyna múmkindik berildi. Orys tilinde tek qazaqstandyq avtorlar qatysty. Sonymen, «Qazaqstan týraly úzdik roman» ádebı baıqaýynyń ekinshi maýsymyna 103 adam tirkelip, 58 roman júkteldi», - dep jazylǵan joba avtorlary taratqan málimette.

Aıta keteıik, úzdik dep tanylǵan romannyń avtoryna ómir boıy aı saıyn 500 AQSh dollary kóleminde syıaqy tólenedi.

«Bizdiń baıqaýdyń jeńimpazy ómir boıǵy aı saıyn 500 dollardan syıaqy alyp otyratynyn esterińizge salamyz. Jeńimpaz tek oqyrmannyń daýys berýimen anyqtalady», - delingen resmı málimette.

Ádebı baıqaýdyń basty ustanymdary mynandaı:

- Memlekettik bıýdjetten tolyq táýelsiz bolý;;

- Ashyq jáne jasyryn múddeler qaıshylyǵyn týdyratyn qazylardan bas tartý, onyń ornyna oqyrman daýysy arqyly jeńimpazdy anyqtaý;

«Mecenat.kz» jobasynyń maqsaty - qazaqstandyq kórkem ádebıetti damytý jáne kitap oqyrmandarynyń yntasyn arttyrý, jazýshylardyń kásibı deńgeıin kóterý jáne olardyń shyǵarmalaryn álemdik kitap naryǵyna shyǵarý.

Eske salaıyq, «Metsenat» ádebı syılyǵy byltyr birinshi ret uıymdastyrylǵan. Alǵashqy maýsymda belgili jýrnalıst, jazýshy Sharhan Qazyǵulovtyń «Kúlpet» romany úzdik dep tanylǵan.

Joba avtory Erlan Asqarbekovtiń aıtýynsha, bıyl «Metsenat» syılyǵyna syrttaǵy qazaq jazýshylaryn kóbirek tartýǵa kúsh salynǵan.