Qazaqstan týraly beınerolık beldi halyqaralyq syılyqtyń jeńimpazy boldy

NUR-SULTAN. QazAqparat - Búgin Pacific Asia Tourism Association qamqorlyǵymen onlaın formatta ótken PATA Gold Awards jyl saıynǵy bedeldi sharasynda «Úzdik trevel vıdeo» nomınatsııasynda «Travelstan» rolıgi jeńiske jetti, dep habarlaıdy QazAqparat tilshisi.

«Kazakh Tourism» Ulttyq kompanııasynyń» atap ótýinshe, rolıktiń basty maqsattarynyń biri - belgili bir toptardaǵy «STAN» jurnaǵyna degen teris qatynasty joıý. Osy ýaqytqa deıin rolık búkil álem boıynsha 480 mıllıonnan astam ret translıatsııalanǵan.

Bul, Qazaqstan týraly trevel-rolıkterdiń halyqaralyq arenadaǵy alǵashqy jeńisi emes. Ótken jyldyń sáýir aıynda «Biz qaıda ushamyz?» vıdeosy Bolgarııada ótken «On the east Coast of Europe» XVI halyqaralyq týrıstik fılmder festıvalinde «Týrıstik destınatsııa» atalymynda 90 sekýndqa deıingi eń úzdik jarnamalyq beınerolık retinde tanyldy.

Al sol jyldyń qyrkúıeginde joǵaryda atalǵan eki rolık te «Aýmaqtardy tanystyrý jáne «Belsendi demalys pen oıyn-saýyq obektileri» atalymdarynda Reseıdegi «Dıvo Evrazıı» III týrıstik beıne jáne anımatsııa festıval-konkýrsynda jeńiske jetti.