Qazaqstan týraly úzdik romannyń avtory ómir boıy aı saıyn 500 dollar alady
ASTANA. KAZINFORM — Astanada «Mecenat.kz» ádebı syılyǵynyń IV maýsymynyń jeńimpazyn marapattaý rásimi ótti. Bul týraly Mádenıet jáne aqparat mınıstrligi málimdedi.
Jyl saıyn ótkiziletin ádebı baıqaý qazirgi Qazaqstannyń shynaıy beınesin kórkem tilmen beıneleıtin shyǵarmalardy anyqtap, talantty avtorlardy nasıhattaýdy maqsat etedi.
Bıyl tórtinshi ret uıymdastyrylǵan baıqaýǵa 21 avtordan qazaq tilinde 9, orys tilinde 12 qoljazba usynylyp, halyqtyq onlaın daýys berý nátıjesinde jas qalamger Álıhan Jaqsylyqtyń «Týrgenev kóshesindegi úı jumysqa qabyldaıdy» atty romany úzdik dep tanyldy.
Jeńimpazǵa demeýshi atynan ómir boıy aı saıyn 500 AQSh dollary mólsherinde tólenetin erikti annýıtettik saqtandyrý polısi tabystaldy.
Marapattaý rásiminde QR MAM Arhıv, qujattama jáne kitap isi komıtetiniń tóraǵasy Rýstam Alıuly quttyqtaý sóz sóılep, mınıstrlik tarapynan júzege asyrylyp jatqan ádebıetti qoldaý sharalary týraly aıtty.
- Ádebıet - ulttyń rýhanı tiregi, ol sana men sezimdi tárbıelep, ótken men búgindi sabaqtastyryp, bolashaqqa baǵdar beredi. Mádenıet jáne aqparat mınıstrligi qalamgerlerge qoldaý kórsetý maqsatynda «Aıboz» ádebı syılyǵy, Prezıdenttik arnaýly ádebı syılyq, «Daryn» jastar syılyǵy syndy mańyzdy bastamalardy júzege asyryp keledi. Sonymen qatar ótken jyly Qazaqstan Jazýshylar odaǵymen strategııalyq áriptestik aıasynda 3 jańa joba iske asyryldy. Memleket basshysynyń 2025 jyldy «Jumysshy mamandyqtary jyly» dep jarııalaýyna baılanysty, jas qalamgerlerge arnalǵan «Erlik pen eńbek dastany» atty jańa baıqaý jarııalandy.Munyń barlyǵy - ulttyq ádebıetti damytýǵa jáne shyǵarmashylyq qaýymdastyqty qoldaýǵa baǵyttalǵan keshendi jumystardyń naqty kórinisi. Búgingi baıqaýdyń ereksheligi – onyń memlekettik bıýdjetten táýelsizdigi. Biz mundaı azamattyq bastamalardy joǵary baǵalaımyz, - dedi Rýstam Alıuly.
Jobanyń negizin qalaýshy Erlan Asqarbekov maýsym saıynǵy qatysýshylar deńgeıiniń artyp kele jatqanyn atap ótip, jeńimpaz týyndylardyń barlyǵy shet tilderine aýdarylyp, baspadan shyǵyp jatqanyn jetkizdi.
Atalǵan júldeni 2022 jyly «Kúlpet» romanymen jazýshy Sharhan Qazyǵul jeńip alsa, 2023 jyly «Ólgender qaıtyp keledi» romanynyń avtory Turysbek Sáýketaev, 2024 jyly «Ómir báıteregi» romanymen Qazaqstannyń eńbek sińirgen qaıratkeri, Halyqaralyq «Alash» ádebı syılyǵynyń laýreaty Sáýle Dosjan ıelengen.
Aıta keteıik, Bakýde Muhtar Áýezovtiń «Abaı» romanynyń latyn qarpindegi jańa basylymy tanystyryldy.