Qazaqstan - turaqtylyq pen tynyshtyǵymen erekshelenetin álem memleketteriniń biri - sheteldik dıplomattar QR Prezıdentine
ASTANA. Shildeniń 10-y. QazAqparat - Memleket basshysynyń atyna ony mereıtoıymen jáne elorda kúnimen quttyqtaǵan jedel hattar kóptep túsýde. Máselen, Memleket basshysyn Qazaqstan Respýblıkasyndaǵy Tótenshe jáne Ókiletti Elshiler de quttyqtady,
dep habarlaıdy QR Prezıdentiniń baspasóz qyzmeti..
Úndistan Elshisi Ashok Sadjanhar óz hatynda N.Á.Nazarbaevtyń «Qazaqstannyń qaryshtaı ósýi, damýy jáne gúldenýine qosqan úlesi shynynda da asa zor jáne biregeı» ekenin aıta kelip, «AÓSShK-ni qurýshy retinde Siz Azııadaǵy beıbitshilik, qaýipsizdik jáne turaqtylyqtyń damýynda bıik belesterge kóterildińiz. Sizdiń munaı qoryn jáne «Bolashaq» baǵdarlamasyn qurý sııaqty bastamalaryńyz Qazaqstan úshin óte tıimdi ári paıdaly ekenin kórsetti»,- dep atap ótken.
Ýkraına Elshisi N.F.Selıvon Nursultan Nazarbaevty mereıtoıymen jáne Astana kúnimen quttyqtaǵan. Hatta Qazaqstannyń turaqtylyǵy jáne tynyshtyǵymen erekshelenip otyrǵan búgingi álemdegi sanaýly memlekettiń biri ekeni aıtylady. «Munyń barlyǵyna Sizdiń kemeńgerligińizdiń jáne ult kóshbasshysy ataǵyna laıyqty túrde ıe bolǵan memleket qaıratkeri retindegi tájirıbeńizdiń arqasynda jetý múmkin boldy»,- delingen.
Vetnam Sotsıalıstik Respýblıkasynyń Elshisi Vý The Hıep óz hatynda Nursultan Nazarbaevtyń atyna «mereıli mereıtoıǵa baılanysty eń jaqsy jáne júrekten shyqqan quttyqtaýlaryn» joldaıdy. Elshi Vetnamda N.Á.Nazarbaevtyń «Qazaqstan halqynyń lıderi, uly jańartýshy jáne qazirgi Qazaqstannyń qaıta órleýi men gúldenýine, sonymen qatar óńirde jáne álemde beıbitshilik, qaýipsizdik jáne yntymaqtastyqty qamtamasyz etý úderisine asqan zor úles qosqan jáne qosyp kele jatqan álemdik deńgeıdegi kórnekti saıası qaıratker» retinde tanymal ekeni atap aıtylǵan.
Grýzııadaǵy Ýkraına Elshisi Vasılıı Tsybenko N.Nazarbaevqa joldaǵan quttyqtaýynda: «Úlken de kúrdeli joldy Sizben birge júrip ótken, eń aýyr synaqtarǵa tótep bergen qazaqstandyqtar óz Otanyn jáne óz Elbasyn maqtanysh etýge barlyq jaǵynan haqyly», - dep jazady.
Reseı Federatsııasynyń Ónerkásip jáne saýda mınıstri V.B.Hrıstenko Qazaqstan Prezıdentine týǵan kúninde budan da ózge úlken jetistikter tilep, «Sizdiń ıyǵyńyzda óz elińizdiń qaryshty damýynyń salmaǵy aýyr jaýapkershiligi jatyr ǵoı»,- deıdi.
RF FJ Memlekettik Dýmasyndaǵy RFKP fraktsııasynyń jetekshisi, RFKP OK tóraǵasy Gennadıı Zıýganov óziniń quttyqtaý jedelhatynda «Postkeńestik tarıhynyń kúrdeli kezeńinde asa kemeńger, belsendi jáne barshaǵa syıly adam basqarǵan Qazaqstan Respýblıkasynyń joly aıryqsha sátti bolǵanyn» atap aıtqan.
