Qazaqstan tuńǵysh ret short-trekten Álem kýbogy kezeńin qabyldaıdy
ASTANA. QazAqparat - Halyqaralyq konkımen júgirý sporty federatsııasy (ISU) Qazaqstanda short-trekten Álem kýboginiń kezeńi ótetinin resmı túrde bekitti, dep habarlaıdy olympic.kz.
Bul báseke Almaty qalasynda ótedi. Al týrnır 2018 jyldyń 7-9 jeltoqsanyna josparlanǵan.
Qazaqstan short-trekten álemdik deńgeıdegi jarysty alǵash ret ótkizgeli otyr. Budan buryn elimizde shortrekshiler qatysýymen Ýnıversıada-2017 (Almaty) jáne Azıada-2011 (Astana) syndy keshendi týrnırler ǵana ótken.
Kýbokty ótkizý úshin Almatyny tańdap alý kezdeısoqtyq emes. Sporttyq ınfraqurylymy jasaqtalǵan zamanaýı sport kesheni men Búkilálemdik stýdentter oıynyn ótkizý tájrıbesi úlken ról oınady. Odan bólek, jankúıerlerdiń belsendiligi de esepke alyndy. Ýnıversıada kezinde árbir jarys kúni ulttyq quramaǵa qoldaý bildirgen jankúıerge toly bolǵan edi.
Qazaqstandyq short-trekshilerdiń álemdik jarystarda sátti óner kórsetýi óz jerimizde ótetin kýboktyq dodaǵa jankúıerlerdi kóp jınaıdy degen senim bar. Ótken maýsymda bizdiń eki birdeı sportshymyz Álem kýbogynyń jalpy esebindegi júldegerler tizimine engen bolatyn. Abzal Ájiǵalıev 500 metrge júgirýden Álem kýboy qorytyndysy boıynshy ekinshi oryn aldy. Al 1000 metrge júgiretin qazaqstandyq Nurbergen Jumaǵazıev úshinshi satyda.
Óz elimizde ótetin Álem kýbogynyń kezeńi ulttyq qurama sportshylarynyń kósile shabýyna múmkindik bermek.
Aıta keteıik, short-trekten halyqaralyq maýsym 8 qarasha kúni Kalgarıde (Kanada) bastalady. Qazaqstanda úshinshi kezeń ótedi. 2018/2019 jylǵy maýsymda Álem kýbogynyń jalpy esebi alty kezeńi ótedi.
Eske sala keteıik, short-trekten Qazaqstan ulttyq quramasy Máskeýde Reseı quramasymen birlesken oqý-jattyǵý jıyndaryn ótkizip jatyr.
