Qazaqstan tuńǵysh ret Qytaı naryǵyna bıdaı kebegin eksporttamaq
Sapar aıasynda delegatsııa QHR Sapany qadaǵalaý, ınspektsııa jáne karantın jónindegi bas basqarmasynyń tóraǵasy Chjı Shýpınmen kezdesti, dep habarlaıdy QazAqparat.
Kezdesý barysynda taraptar Qazaqstannyń aýylsharýashylyq ónimderiniń Qytaı naryǵyna kirýi men shekteýlerdi alý máselelerin talqylady. Atap aıtqanda, Qytaı tarapy QHR-dyń jetkizýshi kompanııalar reestrine engizý úshin bıylǵy sáýirde qoı etiniń óndirisi júıesin jáne et óńdeýshi kásiporyndardy ınspektsııalaıtynyn rastady. Qazaqstannan Qytaıǵa eksporttalatyn 34 ónimge qatysty veterınarlyq jáne fıtosanıtarlyq talaptar týraly Hattama jobasyn qabyldaýdy jyldamdatý máselesi de sóz boldy. Sondaı-aq, Qazaqstan tarapy el aýmaǵynda aýyl sharýashylyǵy ónimderiniń sapasy men qaýipsizdigin baqylaýǵa arnalǵan birikken zerthana qurý týraly bastama kóterdi.
Kezdesý qorytyndysyna sáıkes kórshiles elge eksporttalatyn bıdaı kebegi partııalaryna qoıylatyn ınspektsııa, karantın jáne sanıtarlyq talaptar týraly Hattama jasaldy. Osy kelisimniń arqasynda qazaqstandyq bıznesmender alǵash ret Qytaı naryǵyna bıdaı kebegin eksporttaýǵa qol jetkizbek.
Eske sala keteıik, eki kúndik jumys saparynyń aıasynda qazaqstandyq delegatsııa Qytaıdyń Aýyl sharýashylyǵy mınıstrligi, QHR Halyqaralyq saýda-sattyqqa atsalysý komıteti, QHR Kommertsııa mınıstrligi basshylyǵymen jáne de jergilikti bıznes qaýymdastyǵy ókilderimen kezdespek. Onda eki eldiń saýda-sattyǵy úshin asa mańyzdy birqatar máseleler sheshimin tabady dep kútilýde.