Qazaqstan týmasynyń matadan jasalǵan týyndysy Gınnestiń rekordtar kitabyna usynyldy

«Myń bir túnniń» ertegisi bul jobany qurýǵa serpin berdi. Matadan jasalǵan týyndy jeke-jeke 1000 aıaqtalmaǵan sýretterden turady, olardyń árqaısysynda perishte beınelengen. Bul usaq ári jeke-jeke salynǵan myń sýret 528 sharshy metr aýmaqtaǵy bir sýretti quraıdy, beıne tanymal shyǵys ertegileriniń jelisi boıynsha jasalǵan.

 «Global Festina» halyqaralyq agenttigi - bas uıymdastyrýshylardyń ókili Ulyqbek Kasymqojaev habarlaǵandaı, mega kartına slynǵan júk kóligi Ózbekstannan Chehııaǵa baǵyt aldy. Aldymen bul mega-sýret Pragada, 9-21 shilde aralyǵynda ótetin Incheba Expo kórmesinde, keıin Madrıdtegi ashyq alańda kórsetiletin bolady. Uıymdastyrýshylar atalmysh týyndyny Florentsııada da kórsetemiz dep josparlap otyr.

Gınnestiń rekordtar kitabynyń komıteti «Myń perishte men bir beıne» jobasynyń uıymdastyrýshylary Lekım Ibragımniń mega-sýretin atalmysh basylymǵa engizý jónindegi ótinishin qaraýda. Uıymdastyrýshylardyń pikirine qaraǵanda, álemdik tanymal sýretshiniń jobasy biregeı jáne beıneniń ıdeıasyna, ony iske asyrýǵa baılanysty birqatar kórsetkishter boıynsha rekordty bolyp tabylady. Aldymen qazirgi zamanǵy kórkemsýret ónerinde metamorfozdyń alǵashqy ret qoldanylǵanyn eskerý qajet. Sol jeke-jeke usaq sýretterdi qosqanda bir beıneniń paıda bolatyndyǵyn, atqarylǵan jumystyń úlken kólemi jaıly aıta ketken jón. Árıne, eń bastysy «Myń perishte men bir beıne» sýretiniń qundylyǵy, beretin áseri týraly ıdeıany nazarda ustaǵanymyz jón. Osylardyń barlyǵyn eskere otyryp, «1000 bólshekten turatyn eń úlken sýret» tujyrymdamasy boıynsha «Óner» bólimine ótinish berildi, dep atap ótti uıymdastyrýshylar.

 Avtor týraly: Lekım Ibragımov 1944 jyly Almaty oblysynyń Uıǵyr aýdanyndaǵy Kishi Dekhan aýylynda dúnıege kelgen. Almatynyń kórkemóner mektebinde oqyǵan. Sýretshi professor, Reseı sýretshiler akademııasynyń qurmetti múshesi, Ózbekstan Respýblıkasy sýretshiler akademııasynyń akademıgi, Álemdik sýretshiler seziniń delegaty (Parıj, 1998 j.), Ózbekstannyń halyq sýretshisi bolyp tabylady.