Qazaqstan týmasy Izraılde «Jyl adamy» atandy
ASTANA. QazAqparat - Qaraǵandyda týyp-ósken Dmıtrıı Abramenko Izraılde «Jyl adamy» atandy, dep jazdy Sports.kz.
Jyl saıyn Karmıel qalasynda (Izraıldiń kommertsııalyq, mádenı jáne ındýstrııalyq ortalyǵy) úzdik ǵylym, mádenıet, ádebıet, óner, sport jáne saıasat ókilderine «Jyl adamy» syılyǵy beriledi.
Bul bedeldi syılyqtyń 2016 jylǵy júldesin qazylar alqasy burynǵy qaraǵandylyq, qazirgi Karmıel turǵyny Dmıtrıı Abramenkoǵa berýdi bir aýyzdan uıǵarǵan. Dmıtrıı Ispanııada ardagerler arasynda ótken ústel tennısinen álem chempıonatynda anglııalyq Lorestas Trýmpaýkaspen juptyq razrıadta altyn medal ıelendi. Syılyqty Dmıtrııge qala meri Rına Grınberg tabystady.
Abramenko - KSRO sport sheberi, jeke esepte KSRO chempıonatynyń qola júldegeri, jasóspirimder arasyndaǵy 1983 jylǵy Eýropa chempıonatynda komandalyq esepte qola júldege ıe bolǵan. Jasóspirimder, jastar jáne eresekter arasyndaǵy Qazaqstannyń birneshe dúrkin chempıony.
