Qazaqstan týmasy AQSh-ta Yahoo servısin buzǵany úshin 5 jylǵa sottaldy
Byltyr Baratov aıyp taǵylǵan 9 tarmaq boıynsha óz kinásin moıyndady. Oǵan qamaýǵa alynǵanǵa deıin jeti jyl boıy Yahoo ınternet-servısi qoldanýshylarynyń esep jazbasyn buzdy degen aıyp taǵyldy.
Kanadalyq haker men onyń birneshe sybaılasy Reseı arnaıy qyzmetiniń tapsyrysymen esep jazbalaryn buzýmen aınalysqan. Baratovtyń advokaty onyń klıentiniń naqty kimge jumys istegenin bilmeıtinin málim etti.
Alǵashqyda prokýratýra Baratovty 7 jyl on aıǵa bas bostandyǵynan aıyrýdy surady. Baratovtyń advokattary jazalaý merzimin 3 jyl on aıǵa qysqartýǵa tyrysty.
Olar Baratovtyń Yahoo qoldanýshylary esep jazbalaryn buzǵanda 19 jasta ekendigin, bul qylmysqa áýestikpen barǵandyǵyna sendirdi.
Onyń advokattary Endrıý Manchılla men Robert Fenton sotta klıentiniń eshkimge zııan keltirgisi kelmegendigin, istegen áreketine ókinetinin málimdedi.
Derekter boıynsha, Baratov 2010 jyldan beri 11 myńnan astam qoldanýshynyń esep jazbasyn buzyp, olardyń jeke derekterin satýmen aınalysqan. Olardyń ishinde memlekettik qyzmetshiler, dıplomattar, qarjy qurylymdarynyń qyzmetkerleri, kommertsııalyq kompanııalardyń akkaýnttary bar.
Baratov tutqyndalǵan kezde Kanadanyń Ontarıo provıntsııasynda Ankastera qalasynyń syrtyndaǵy quny 650 myń dollar turatyn úıde turǵan. Ol qymbat kólikterdi tizgindegen. Onyń kollektsııasynda Lamborghini, Porsche, Aston Martin, Mercedes jáne BMW markaly kólikter bolǵan. Jas jigit áleýmettik jelige júz dollarlyq aqsha býmalaryn ustap túsken sýretterin salǵan.
23 jastaǵy Qazaqstan týmasy 2017 jyldyń tamyzynda óz kinásin tolyqtaı moıyndady. Buǵan deıin ol ózine taǵylǵan aıypty teriske shyǵaryp, Kanadadan AQSh-qa ekstradıtsııalanýdan bas tartqan edi.