Qazaqstan týmasy 10 jyl daıyndyqtan keıin ǵaryshqa ushady
Baıqońyrǵa kelgen ekinshi kúni HǴS-68 negizgi jáne rezerv ekıpajdary aldaǵy ushyrylymǵa qatysatyn elderdiń týyn kóterýdiń dástúrli rásimine qatysty. 2022 jyldyń 7 qyrkúıeginde negizgi ekıpaj músheleri – reseılik ǵaryshkerler Sergeı Prokopev, Dmıtrıı Petelın jáne NASA astronavty Frenk Rýbıo, sondaı-aq olardyń dýblerlary – Roskosmos ǵaryshkerleri Oleg Kononenko, Nıkolaı Chýb jáne NASA astronavty Loral O'Hara ǵarysh aılaǵynda birinshi ret jattyqty. Olar «Sokol-KV2» qutqarý skafandrlaryn kıip, olardyń germetıkalyǵyn teksergen.
Odan keıin ǵaryshkerler men astronavtar ózderi ushatyn «Soıýz MS-22» ǵarysh kemesiniń qyzmet kórsetetin jabdyqtaryn tekserip, ushý baǵdarlamasyn zerttedi, borttyq qujattama jáne HǴS-qa jetkizilgen júktermen tanysty, dep habarlaıdy ıÝ.AGagarın atyndaǵy Ǵaryshkerlerdi daıarlaý ortalyǵynyń baspasóz qyzmetinen.
Negizgi ekıpaj komandıri – Sergeı Prokopev. №1 ǵarysh kemesiniń bortınjeneri, Qazaqstan týmasy Dmıtrıı Petelın Qostanaı qalasynda dúnıege kelgen, jasy 39-da. Ol qaladaǵy tehnıkalyq-ekonomıkalyq lıtseıdi bitirip, sodan keıin Ońtústik Oral memlekettik ýnıversıtetiniń aeroǵarysh fakýltetinde bilim alyp, ushaq jáne tikushaq qurastyrý ınjeneri mamandyǵyn meńgerdi.
D.Petelın ǵaryshkerler jasaǵynda 2012 jyldan beri jumys isteıdi jáne bul ǵaryshker mansabyndaǵy alǵashqy ushyrylym bolmaq. Ekıpajdyń úshinshi múshesi, amerıkandyq astronavt Frenk Rýbıo 46 jasta, ol áskerı hırýrg, AQSh armııasynyń podpolkovnıgi. Teorııalyq kosmonavtıkanyń negizin salýshy Konstantın Tsıolkovskııdiń atymen atalǵan «Soıýz MS-22» basqarylatyn ǵarysh kemesi osy jyldyń 21 qyrkúıeginde Baıqońyr ǵarysh aılaǵynyń 31-shi alańynan ushyrylady dep josparlanǵan.
