Qazaqstan týy Brıýsseldegi Gran-Plasta alǵash ret kóterildi
ASTANA. KAZINFORM — Belgııalyqtar Koroli jáne Patshaıymynyń Qazaqstanǵa memlekettik saparyna oraı jáne Qazaqstan táýelsizdiginiń 35 jyldyǵy qurmetine áıgili Gran-Plasta ornalasqan Brıýssel ratýshasy ǵımaratynda elimizdiń memlekettik týy alǵash ret kóterildi, dep habarlaıdy Kazinform agenttiginiń menshikti tilshisi.
Brıýssel qalasy bıligi men Belgııa Syrtqy ister mınıstrliginiń qoldaýymen ótken sımvoldyq máni bar osynaý oqıǵa eki el arasyndaǵy dostyqtyń, ózara qurmettiń jáne odan ári nyǵaıa túsken seriktestiktiń belgisi boldy.
Osy oqıǵaǵa oraı, búgin ıÝNESKO-nyń Dúnıejúzilik muralar tizimine engen Gran-Plasqa Qazaqstan elshiliginiń ókilderi, qazaqstandyq stýdentter, Belgııada turatyn otandastar, sondaı-aq Brıýsselge kelgen týrıster men qonaqtar jınaldy.
Ulttyq kıim kıgen qazaqstandyq stýdentter mýzykalyq fleshmob uıymdastyryp, is-sharanyń kórkin ashty. Qonaqtar sondaı-aq qazaq mádenıetiniń elementterimen tanysyp, ulttyq taǵamdardyń dámin tatý múmkindigine ıe boldy.
— Biz Brıýssel ortalyǵynda Qazaqstan týyn kórgenimizge qýanyshtymyz. Biz osynda oqımyz, ózimiz de Belgııa mádenıetin úırenip, dostarymyzdy Qazaqstanmen tanystyrýǵa tyrysamyz. Mundaı is-sharalar elderimizdi odan ári jaqyndata túsedi, — dep atap ótti «Qazaq Society in Belgium» stýdenttik uıymynyń jetekshisi Nazgúl Nurǵalı.
Brıýssel qalalyq ákimshiliginde Qazaqstan týynyń kóterilýi dostyqtyń jáne Qazaqstan men Belgııa arasyndaǵy qarym-qatynastyń nyǵaıýynyń taǵy bir sımvolyna aınaldy.
Eske sala keteıik, Qazaqstan Belgııanyń 12 ýnıversıtetimen kelisimshart ornatady.
